Nongpoh, Nailar 16: Ki Doctor, ki Nurse, ki nongtrei ha ryngkat ki bor pyniaid ka Bethany Hospital Nongpoh mynta ka janmiet ki la pynrem jur halor ka jingshah pyniap bad shah leh beijot kawei na ka Doctor ba dang shah hikai ha RG Kar Medicla College bad Hospital, Kolkata bad ki dawa jur ba dei ban kem bad pynshitom jur ia kito ki runara kiba la don kti ban leh ia katei ka kam pap ka kam sang kaba ym lah ban pdiang ha ka imlang ka sahlang.
Kum ka jingpynpaw ia ka mynsiem jong ka jingsngewlem, ki Doctor, ki Nurse, ki nongtrei bad ki bor pyniaid ka Bethany Hospital Nongpoh mytna ka janmiet ki la pynlong ruh da ka jingthang mombati kum ka jingngewlem ia katei ka Doctor bad ia kiba haing hasem kiba la mad ia kane ka jingjia kaba sngewsih bad kaba ym lah ban pdiang ha ka longbriew ka man briew.
Naduh ki doctor bad ki Nurse ki la pynrem jur bad ki la dawa na ki bor sorkar ka jylla West Bengal ba ki dei ban shim khia ban kem ia baroh kiba don kti ha kaba pyniap bad leh beijot ia ktei ka Doctor bad kum kane ka jingjia kam dei shuh ban jia bad ki bor ka ain ki dei ban pynshitom ia ki runar khnang ban tehlakam ia kim kine ki kam kiba ktah shisha ia ka long briew ka man briew.
Na ka laing u Dr. C.M Pohshna lem bad kiwei ki doctor, ki la pynpaw ruh ba ki ia snoh ktil ang ban pynpaw ia ka jingpyrshah halor kane ka jingshah pyniap ka Doctor kumba la iakhih da ki Doctor ha kylleng ka ri India. Ki la pynrem jur ruh ia kane ka jingshah pyniap ka doctor kaba la ktah ia ka jingmut jingpyrkhat ym tang ia ki doctor bad ia ki paidbah ka ri hi baroh kawei.
Kum ka jingiasnoh kti lang halor kane ka jingshah pyniap kane ka doctor ha Kolkata, na ka liang ki bor pyniaid ia ka Bethany Hospital Nongpoh ki la pynbna paidbah bah ruh ba kin khang ia ka jingsumar ia kiba wan nabar (OPD), kaba long kum ka dak ba ki sngewsih kthang halor ka jingshah pyniap katei ka doctor ha Kolkata.
