Ka Khun Hynniewtrep National Awakening Movement (KHNAM) hynne ka sngi kala pynrem jur iaka Sorkar Jylla haba iadei bad ka jingpynjlan iaka samoi treikam jong ki District Council hapoh ka Jylla.
Haba kren shaki lad pathai khubor u Working President ka KHNAM u Bah Thomas Passah ula kynnoh ruh baka jingshim tulop ki MDC ka long beain namar ka samoi treikam jong ki District Council kala kut naduh u bnai Rymphang 2024.
U Bah Thomas ula kynnoh ba kane ka jingpynjlan biang iaka samoi treikam ki District kadei ka jingleh donbor daka Sorkar Jylla bad kane ka pynduh iaka hok ki paidbah ban ioh thep Vote.
“Katkum ki kyndon ka Sixth Schedule, iaka ilekshon MDC lah ban pynjlan tang lada don kaei kaei kaba kyrkieh (Emergency) haka u Lat ka Jylla ula sngewiahap ban pynjlan” la ong u Bah Thomas.
U Bah Thomas ula kynnoh ba ka jingaidaw ba la pynjlan iaka ilekshon MDC namar ki Delimitation Committee kim pat dep iala ki kam, ka long kaei kaei kaba ym lah ban pdiang bad kadei tang ka buit tuh jong ka Sorkar.
“Ka jingai por iaki Delimitation Committee ban pyndep iala ki kam kaba khia tang ha i por ba lyngkot kam long kaba suk. Kane kadei tang ka buit jong ka Sorkar ban ioh bat jubor iaka bor haki District Council khlem da pynlong iaka ilekshon” ula kynnoh.
Haba iadei bad ka jingpynkylla iaka Sixth Schedule, u Nongialam ka KHNAM ula kynnoh daka ba ong “Ka Sorkar Jylla kan sa shim kabu halor kane ban pynjlan biang iaka samoi treikam ki District Council”.
“Ai ba ki jingpynbeit iaka Sixth Schedule kin nang iaid. Ngi lah ban pyndonkam haki ilekshon MDC ban wan hynrei ban pyndonkam ia kine tang ban ioh bat jubor iaka bor jong ki District ka long beain bad kam iahap haka synshar paidbah” ula ong.
U Bah Thomas ula ong ba shen ka KHNAM kan sa thoh sha u Lat ka Jylla namar u khlieh jong ki District Council udei hi u Lat ka Jylla.
