Ka Meghalaya Pradesh Congress Committee (MPCC) ka la pynmih syndon da ka jingpynbna ban sospon noh ia ki 2 ngut ki MLA jong ka na bynta hynriew snem lynter lait noh lada don da kawei ka jingpynbbna, hadien ka jingkynnoh ba kine ar ngut ki MLA ki la leh pyrshah ia ki kyndon aiñ jong ka party.
Kine ki arngut ki MLA ka party Congress kiba la shah sospon na bynta hynriew snem ki kynthup ia u Bah Charles Marngar, MLA/MDC ka 8-Mawhati Constituency bad u Bah Gabriel Wahlang, MLA/MDC ka 32-Nongstoin Constituency.
Katkum ka shithi ba la pynlait lyngba ka Kong Wansuk Syiem, ka MP barim ka Shillong Parliamentary Seat bad ruh ka General Secretary ka MPCC ba dei khmieh ia ka Administration, la pynpaw, ba ka Congress party hapoh ka jylla Meghalaya ka la pynbna paidbah ban sospon ia kine ki arngut ki nongialam kiba dei ruh ki MLA/MDC halor ka nongrim ba ki la pynkheiñ ia ki kyndon treikam jong ka party Congress.
Kumban kdew, ha kine ki khyndiat sngi, ka khubor ka la paw pyrthei, ba ki nongialam ka Party Congress hapoh ka jylla Meghalaya, ba kynthup wat ia u President barim ka MPCC u Dr. Celestine Lyngdoh mynta MLA ka Umsning Constituency, u Bah Charles Marngar, MLA/MDC ka Mawhati Constituency bad u Bah Gabriel Wahlang MLA/MDC ka Nongstoin Constiuency ki la rai ban mih noh na ka party Congress bad ban leit pyniasoh sha ka party NPP kaba lamkhmat ia ka sorkar jylla.
