Ki bor pulit ka jylla Assam ki la pynlong ia ka jingpeitngor ha kylleng ki jaka jong ka jylla Assam, kaba dei hadien ba ka kynhun ehrang ULFA-I ka la thmu ban pynbthei bom ha kiba bun ki jaka ha nongbah Guwahati bad ha kiwei ki jaka ka jylla Assam.
Kum ban pynkynmaw, ka ULFA-I ka la phah ruh ia ka kyrwoh khubor lyngba ka Email sha ki lad Pathai khubor ha ka jylla Assam, ba ka la thmu ban pynbthei bom haduh 24 tylli ki jaka, kata shuwa ka jingrakhe Sngi Laitluid ka ri India bad na ka liang ki bor Pulit Assam ruh ki la shim khia ban pynlong ia ka jingthwet kaba jur na ka bynta ban pynpulom ia kane ka jingthmu katei ka kynhun ehrang ULFA-I.
Kumba la pynpaw da u DGP ka Assam u G.P Singh, u la iathuh ba hadien ba la lap ia ki kynja bom kumba la kam da ka kynhun ehrang ULFA-I, ki bor pulit ka Assam ki la peitngor bha bad shim khia ruh da kaba pynlong ia ka jingpahara kaba jur ha kylleng ki jaka ka Assam halor kane ka jingthmu pynbthei bom ka ULFA-I.
Na ka bynta ka shongsuk shongsain ha ka jylla, Assam, nalor ba la shim khia ban shim ia ki lad jingiada ban pynpulom ia kane ka jingthmu pynbthei bom ka ULFA-I, na ka liang u DGP u GP Singh u la kyrpad ruh ia ka jingiatrei lang ki paidbah ba kin ia snoh kti lang bad ki bor pulit bad ki kino kino kiba lah ban ai jingtip ne lap ia ki bom ka tnad Pulit ka tyrwa ruh da ka khusnam pisa kaba T. 5 lak.
