Ki pulit ka Mawlasnai Police Station ha ka jingleit pahara surok(mobile Night Patrolling) hynnin ka miet ki la ioh ban kurup da ki spah litar ka kyiad pyrsi, kaba dei hadien ba ki la ioh ban bat ia kawei ka Kali Alto kaba don ia u number ML 05 AB 7761, ha kaba ki la suba ba katei ka kali ka la kit kyiad beain.
Ha ka jingialam u Sub Inspector u R. Umyiap bad kiwei ki pulit, ki Pulit ka Mawlasnai ki la pynlong ia ka jingpahara ia ka surok sha ka thain Umraiang bad ha ka jingsuba jur ki la bat ia kawei ka Kali Alto ba la suba ba ka kit kyiad bad ha ka jingtalasi ki la lap shisha ia kane ka kali ba ka kit kit kyiad beain.
Ia kane ka Kali la niah da uwei u rangbah ba la tip kyrteng kum u Tral Kurbah, 41 snem ka rta na ka shnong Madan Nongur ha ka thain Sohiong bad dei lyngba ka jingioh bat ia kane ka Kali ba ki pulit ruh ki la ioh ban kurup ia katei ka kyiad pyrsi ba la thep hapoh ka byrni khaw.
Ka khubor ba la ioh lum na ki Pulit ka Ri Bhoi, la ong hadien ba la ioh bat ia katei ka Kali Alto, la pynlong ia ka jingkhynra hapoh ka Kali bad dei lyngba ka jingkhynra ba ki pulit ki la kem noh ia u Dribar ryngkat ka jingkurup ia ka kyiad na ka bynta ban pynlong ia ka jingtohkit.
Na ka liang ki Pulit ka Mawlasnai ki la rah noh ia une u Dribar sha CHC Bhoirymbong ban pyndep ia ka jingeksamin ki doctor bad hadien ba la dep ia ka eksamin ki doctor la rah noh ia u sha Mawlasnai Police Station ban bteng ia ka jingtohkit. La ong ruh ba ia une u dribar bad u trai katei ka kyiad, ki Pulit ki la pynngat noh ha ki kyndon ain jong ka ME Act, kaba dei halor ka jingshalan tuh ia ki kyiad beain.
