Ban tehlakam ia ki Kali paidbah kiba pyndait ïit ïong ha Nongbah Shillong, ki Pulit ka East Khasi Hills District hapoh ka jingialam u Superintendent of Police u BahSylvester Nongtnger, ki la dang pynjur ia ka jingkhynra ia ki Kali paidbah kiba tah ïit ïong ha kyllng ki jaka jong ka Nongbah Shillong.
Na ka liang ki bor pulit ka East Khasi Hills District, ha kine ki sngi la sakhi ba na ka por sha ka por ki la pynlong ia ka jingkhynra ne bat ia ki Kali paidbah ba pyndait ïit ïong, kaba long pyrshah ia ki kyndon jong ka aiñ.
Kumba la iathuh ha ka sngi Saitjan da u Superintendent of Police ka East Khasi Hills District u Bah Sylvester Nongtnger, la ong ba kane ka jingwad bniah ne ka jingkhynra ia ki Kali ba pyndait ïit ïong, ka dei shi bynta ban tehlakam halor ka jingpynkheiñ ia ki kyndon jong ka Motor Vehicle Act bad ruh ka hukum ba la pynmih da ka supreme court.
U la ong ruh na ka bynta ban tehlakam ia kito ki Kali kiba pynkhein ain bad kiba tah ia ki ïit ïong, la pynlong ia ka jingkhynra ha kylleng ki jaka jong ka Nongbah Shillong bad kumba long haduh mynta la ioh ban weng haduh 752 tylli ki kali ba tah ïit ïong bad la dep ruh ban dain kuna katkum ba la buh ka kyndon ain.
Shuh shuh, u la bynrap ruh ba kane ka jingshim khia ki bor pulit ka East Khasi Hills ban weng ia ki kali ba tah ïit ïong ka long ban pynthikna ia ka jingsngain ki riew paidbah bad ruh ban iada ia kino kino ki kali ba thmu ban leh ia ki kam sniew bad kino kino ki kali kiba dang ialeh pyrshah ban tah ïit ïong kin shah pyngngat beit katkum ki kyndon jong ka ain.
