Kum ka jingplie lad plie lynti ia ki khun samla ka dong bad ka thain Ri Bhoi Sepngi ba kin ioh lad ban sei ia ki sap ki phong bapher bapher, ka ophis u Sub Divisional Officer ka Patharkhmah Civil Sub Division ka la pynlong da kawei ka tamasa ba 2 sngi ha Patharkhmah ba la tip kum ka Jowe Festival kaba la long ha ka 13 bad 15 tarik u Nailar 2024 ha madan ka Western Ri Bhoi Sport Association, Umsaw patharkhmah.
Haba pynlong ia kane ka tamasa la kyrshan ruh da ka ophis u Block Development Officer ka Jirang C&RD Block bad ka ophis u Deputy Commissioner ka Ri Bhoi bad ruh la mang tyngka lyngba ka Chief Minister’s Special Grant bad lyngba ka Meghalaya Sustainable Tourism Enhancement Programme (MSTEP).
Ha kane ka Jowe festival, la pynlong ia ki prokram bapher bapher, naduh ka jingiakop thei bad rang bhabriew, ka jingiakop shad tynrai, ka jingiakop shed tynrai, ka jingiakop dro dur, ka jingiakop rwai, ka jingiakop pyni riam tynrai, ka jingiakop shad, ka jingiakop rwai bad kiwei kiwei ki prokram, bala shim bynta shitrhem da ki samla ka Ri Bhoi Sepngi.
Ha kane ka tamasa, ki nongrwai ba paw, ki nongtem ba paw bad ki kynhun tem ba paw ha ka jylla, ki la wan ban ai mynsiem ia ki khun samla, lyngba ki jingrwai bad ki jingtem bapher bapher ban pynshongkun ia kane ka tamasa.
La pynkut ia kane ka tamasa ha ka 15 tarik u Nailar 2024, kaba dei ka jingrakhe ia ka sngi laitluid ka ri India, ha kaba la pynshongkun da ki sap ki phong bapher bapher ki samla. U MLA ka Jirang Constituency u Bah Sosthenes Sohtun u la wan ban shim bynta kum u kongsan bad la sakhi lang ruh da ka jingdon lang U MLA ka Umroi u Bah Damanbait Lamare kum u symbut kongsan, u SDO ka Patharkhmah Civil Sub Divsiion u Bah M.B Tongper, ki ophisar sorkar, ki nongialam shnong ka thain bad da ki spah ngut ki paidbah.
Kumba la pynpaw, ka jingthmu kane ka Jowe festival kam shong eh tang ban pynphuh pynphieng ia ka jingrakhe ia ka sngi laitluid ka ri India, hynrei ka thong ka long ban ai rynsan ia ki khun samla katei ka thain ba kin sei ia ki sap ki phong ha ki bynta bapher bapher jong ka jingim, kata naduh ka sap rwai, ka sam tem, ka sap shet jingshet, bad kiwei kiwei ki sap kyrpang ki samla nalor ka jingthmu ban pynneh pynsah ia ka jingriewspah katei ka thain ha ki riti ki dustur ne ka jinglong tynrai.
