Ha ka jingiakhun phainal jong ka Saudi Super Cup, ka Al-Hilal ka la ioh ban khur ia ka nam lahduh ha katei ka lympung ialehkai ba heh hapoh ka ri Saudi Arabia, hadien ba ka la lah ban pynliem noh ia ka Al-Nassr da 4-1.
Ka jingiakhun phainal ha ka Saudi Super Cup, kaba la long hapdeng ka Al-Hilal pyrshah ia ka Al-Nassr, ka dei ka jingiakhun kaba iakhaid, namar kitei ki kynhun ki don ia kita ki rangialehkai ba kynsai bad kiba la bna nam ha ka pyrthei.
Ka kylla step jong ka jingiakhun, ka Al-Nassr ka la lah ban lamkhmat ia ka jingiakhun lyngba ka kol kaba la thep da u Christiano Ronalno ha ka minit ba 44 jong ka jingiakhun bad kiba la pynkut ia ka kylla step da 1-0.
Haba bteng ka kylla miet jong ka jingiakhun, ki rangialehkai ka Al-Hilal, ki la pyrshang ban ialehkai bha bad khamtam eh ban pynphai ia katei ka kol kaba ki la shha thep ha ka Al-Nassr. Ha kaba kum katei ka jingiakhun ha ka minit ba 55 ka Al-Hillal, ka la ioh ban pyniakhaid ia ka jingiakhun lyngba ka kol kaba la thep da u S. Milinkovic.
Katba ka jingiakhun ka dang iaid shakhmat, ki rangialehkai ka Al-Hilal, ki la nion tyngeh ia ki rangialehkai ka Al-Nassr bad ha kaba kum katei ka jingiakhun, ka Al-Hilal ka la ioh biang ban pynkhih jar lyngba u A. Mitrovic ha ka minit ba 63 bad 69, hadien kata pat sa ka kol na u Malcom ha ka minit ba 72, kaba la neh haduh ka kut ka jingiakhun bad kaba la pynlong ia ka Al-Nassr ba ka hap ban pdiang ia ka nam shahrem hakhmat ka Al-Nassr da 4-1 ha ka Saudi Super Cup.
Ka Al-Hilal ka dei ka kynhun kaba khlain eh ha ki lympung ialehkai hapoh ka ri Saudi Arabia bad ia kata la sakhi ba ha ka Saudi Pro League ne ka lympung ialehkai phutbol kaba heh duh hapoh ka ri Saudi Arabia bad ha katei ka lympung ialehkai, ka Al-Hilal ka la dei kum kata ka kynhun kaba la long kum ka kynhun lahduh.
