Uwei u rangbah bad uba dei ruh u Dribar jong kawei ka Trok, u la khlad hapoh ka trok kaba u la leit ban pynieng ha kawei ka petrol pump ha Byrnihat bad ia kane la lap da ki nongtrei ka petrol pump kiba la pyntip noh mardor sha ki bor Pulit ka Byrnihat Police Outpost.
Kane ka jingjia ka la jia mynta ka sngi ha ka por 1.55 mynsngi ha kawei ka pump ba la tip kum ka Warjri Petrol Fuel Stop, kaba don ha Lumnongrim Byrnihat, ha kaba uwei u dribar ba wan pynieng ia ka trok ha katei ka petrol pump, u la khlad hapoh ka Trok bad ia kane la lap shwa da ki nongtrei ka petrol pump ba u Manager u la pyntip sha ki bor pulit ka Byrnihat.
Une u Dribar trok ba la khlad hapoh ka trok la tip kyrteng kum u u Mofidul Islam, na Bapurbhita Pt-3, Dhamar Reserve, Goalpara, Assam bad kane ka trok kba u niah ka don ia u number AS-01-SC-1741.
Kumba la pyntip da ki bor pulit ka Ri Bhoi, la ong ba nyngkong eh ki nongtrei ka petrol pump ki la leit ban kyrsiew ia utei u dribar uba ki suba ba u thiah hapoh ka trok, hynrei nym ba iohsngew bad khlem plie ia ka Kali ki la suba noh ba ka la don ei ei bad ki la pyntip noh sha ki bor pulit ka Byrnihat Police Outpsot bad dei lyngba ka jingwan poi ki Pulit la tip ba utei u dribar u la khlad hapoh ka trok ha kaba kim pat tip ia ka daw ka jingkhlad jong u.
La iathuh ruh ba katkum ka CCTV u Dirbar trok u la wan ban pynieng ia katei ka trok ha petrol pump ha ka 17 tarik u Nailar 2024 ha ka por 2.15 janmiet bad mynta ka sngi dei namar ba u khlem khie shuh la leit ban kyrsiew da ki nongtrei ka petrol pump bad namar ba um shym la khie wat hapdeng ba la tied ia ka jingkhang kali la pynlong ia u Manager ban pyntip noh sha ki bor pulit, ha kaba dei lyngba ka jingwan ki pulit ba la tip ba utei u Dribar u la khlad noh hapoh ka trok hadien ba la khyllied ia ka jingkhang ka trok.
La ong ruh ha ka jingtohkit ki Pulit, la tip ruh ba une u dribar u dei u nongtrei ka Star Cement, ha kaba u la wan na Star Cement Plant Chamata Pathar Sonapur, Assam ban leit sha Lumshnong ha East Jaintia Hills bad phewse kane ka jingjia ba sngewsih ka la jia khlem pat da tip ia ka daw tynrai.
Shuh shuh, hadien ba la pynlong ia ka jingtohkit la rah noh ia ka met une u dribar sha Civil Hospital Nongpoh na ka bynta ban pyndep postmortem examination bad halor kane ka jingjia, ki pulit ki dang pynlong ia ka jingtohkit bad kumjuh ruh ki la dep ban pyntip sha kiba haing hasem jong u na ka bynta ban wan shimti ia kane ka met jong une u dribar.
