Da ka jingsngewkhia kaba jur halor ka jingshah pynslem ka tulop jong ki Nonghikai SSA, mynta ka sngi na ka liang ki nongialam ka Meghalaya SSA School Teachers Association (MSSASTA), ki la ther tyngeh pat ia ki Non-Teaching staffs ka SSA ba dei namar ka jingiakhih jong ki pyrshah ia ka sorkar ba ki Nonghikai ki shah pynslem ka tulop na bynta u bnai Naitung.
Ia kane ka jingkynthoh, la kynthoh da u President ka MSSASTA, u Bah Aristotle Rymbai haba kren bad ki Nongthoh Khubor mynta ka 19 Nailar ha Shillong Press Club.
U Bah Aristotle Rymbai, u la iathuh, ba kum ka kynhun ki nonghikai ka jylla, haba ki la pyrshang ban wad ia ka daw balei ba ka sorkar jylla ka pynslem ban siew ia ka tulop jong ki Nonghikai SSA na bynta u bnai Naitung, ha ka jingiakynduh bad ha ka 6 tarik Nailar, ka MSSASA kala leit duh ia u State Project Director u Swapnil Tembe halor kane ka mat la pyntip ba ka tulop jong ki ka slem namar ka jingnang bteng ka jingiakhih jong ki Non Teaching Staff ka SSA.
“Ngi dap da ka jingsngewkhia kaba jur halor kane ka jingshah pynslem ka tulop jong ki nonghikai SSA, da kaba kynthoh ba ki nongtrei ka tnad SSA kim donhok satia ban pynduh ia ka tulop jong ki nonghikai, watla ki don ka hok ban IAKHIH”, ong u Bah Rymbai.
U la iathuh, ba na ka liang ka sorkar ka la dep mang pisa na bynta ban siew ia ka tulop jong ki nonghikai SSA na bynta u bnai Naitung, hynrei ka pisa kam poi sha ki nonghikai namar ka jingnang bteng ka jingiakhih jong ki SSA Non Teaching Staff, na ka liang ka Association kam kynthoh ia ka jingiakhih jong ki hynrei kaba sngewkhia ka long ba namar jong ki jynjar pat da kiwei da kaba kdew ruh, ba ki la pynkheiñ ia ka Article 21 bad 300 (a) kaba kdew shai ba kum ki nongshong shnong ka ri India kim donhok ban pynduh ia ka tulop jong kiwei.
Shuh shuh ruh, u President ka MSSASTA, u la pynrem ruh halor ka jingdon katto katne ngut ki briew kiba la kam ba ki dei napoh ka Association da kaba ong ruh ba kam leilei lada slem tulop shibnai ne ar bnai ruh, na ka liang ka Association ka la kyrpad na ka sorkar jylla Meghalaya ba kan thaw da kino kino ki lad ban pynlait noh ia ka tulop jong ki nonghikai SSA.
