Ki ri ba khlain bor jong ka pyrthei, kiba kynthup ia ka ri France, Germany, Spain, bad United Kingdom, ki la wan ban iashim bynta ha ka wat ba nyngkong jong ka jingkilan met jong ki shipai suin ki ri ka pyrthei ha India, kaba la pyniaid da ka Indian Air Force ha Sulur Air Base jong ka jylla Tamil Nadu ia kaba la tip kum ka Exercise Tarang Shakti naduh ka 6 tarik haduh ka 14 tarik u Nailar 2024.
Kane ka jingkilan met jong ki shipai suin, kadei kawei na ki jingkilan met kaba ba heh tam ha ka pyrthei kaba la pynlong da ki shipai suin ka ri India, ka Indian Air Force naduh ki snem ba lah dep bad kaban dang pynlong ruh ha ki snem kiban sa wan. Na ka liang ka ri India, ha ka jingshisha ka la khot sngewbha ia kumba sanphew tylli ki ri ka pyrthei ban wan iashim bynta ha kane ka jingiakilanmet.
Nalor kitei ki ri kiba la kdew kyrteng haneng, kiwei de ki ri kiban sa wan ban iashim bynta pat ha ka wat kaba ar jong kane ka jingkilan met ki kynthup naduh ka ri Australia, Bangladesh, Greece, Spain, United Arab Emirates, United States of America nalor kiwei de ki khatphra tylli ki ri kiban long kum ki nongpeit pyrman.
Ha ka jingkilanmet “Exercise Tarang Shakti” jong ka wat kaba ar, kaba yn sa pynlong pat ha ki lum shyiap jong ka jylla Rajasthan ha Jodhpur naduh ka 1 tarik haduh ka 14 tarik u Nailur, 2024, yn sakhi ia kitei ki ri ka pyrthei ki ban wan ban pyni bad pynher ia ki liengsuin iakhun thma, kiba khlain bor ki jongki, kiba kynthup naduh ka F-18, A-18, C-130, F-16, A-10, KC-130, KC-135 nalor ka Eurofighter Typhoon bad kynthup ruh ia ki liengsuin kiba la shna hapoh ka ri India kum ka Tejas, Rafale, Mirage 2000, Jaguar, bad ka liengsuin MIG 29.
