Kum ka jingkylluid mynsiem ka ing ka sem jong u (L) Welingroy Jyrwa bad (L) Tbn. Dr. Friday Lyngdoh ba la long teng ruh kum u Myntri Sorkar bari ka sorkar jylla, kiba la noh synniang ia ka jaka na ka bynta ban tei ia ka skul Nongjri Presbyterian Secondary school, ki bor pyniaid katei ka skul mynta ka sngi ki la pynkup burom ia kiba haing hasem bad ruh ryngkat ka jingbuh ia u mawshah jingkynmaw ia kitei ki ar ngut ki riew rangbah kiba la kloi ban ai sngewbha ia ka jaka ba katei ka skul ka la ieng trung haduh kine ki sngi.
Ïa utei u mot sah kynmaw la wan ban plie paidal da u Dr. D. D. Lapang kum u kongsan bad uba dei ruh u Myntri rangbah barim Jong ka sorkar jylla bad ruh u Adviser Jong ka sorkar jylla.
La sakhi lang ha kane ka sngi da ka jingdon lang u bah Charles Marngar MLA MDC Mawhati bad uba dei ruh u President ka School Managing Committee, Ki pastor, u bah James born Jana Chairman Nongjri Pyllun, Tbn. W B Malieh, B Kyrsian Secretary SMC, Ki bahaïing ha sem Jong I Late Welingroy Jyrwa bad Late Tbn. Dr. Friday Lyngdo, ki nonghikai, ki khynnah skul lem bad kiwei kiwei.
Na ka liang ka Skul bad ka Balang Presbyterian ki la tei ïa u mot sah Jingkynmaw na ka bynta ka longïing longsem jong kitei ki arngut ki rangbah “bam kwai ha dwar u Blei” Ka long ban pynsah kynmaw ïaka jingai sngewbha da katei ka longïing ïaka jaka ban tei ïaka building skul Jong ka Nongjri Presbyterian Sec. School, kaba la ïeng haduh kine sngi bad kaba la dang iai kyntiew ia ka jingnang jingstad ki samla lyngba kane ka shlem ai jinghikai ka Nongjri Presbyterian Secondary School.
Ha kane ka sngi la ai jingkren naduh u Dr. D.D Lapang bad ruh u Bah Charles Marngar, ha kaba ki la ai ka jingkhublei kaba kyrpang ia ka ing ka sem jong u (L) Welingroy Jyrwa bad (L) Tbn. Dr. Friday Lyngdoh, namar dei lyngba ka jingkylluid mynsiem jongki, kane ka skul jong ka Nongjri Presbyterian Secondary School ka la ieng trung ban ai jingnang jingstad ia ki khynnah bad ki samla katei ka thain Nongjri.
Na ka liang u Dr. D.D Lapang bad u Bah Charles Marngar, ki la pynpaw ruh ba kane ka jingiaid shaphrang kane ka skul ka dei na ka jingai sngewbha katei ka longing sha ka Balang Presbyterian, ba ka Balang ka la lah ban seng ia kane ka skul, kiba dei hapdeng shibun ki jingeh bad ki jingtynjuh kaba u Blei u la don ryngkat namar ka jingthmu ka long ban kyntiew ia ka pule ka puthi ki samla.
Na ka liang u Dr. D.D Lapang bad ruh u Charles Marngar ha kane ka sngi, ki la pynpaw ruh ba ki don ka jingangnud ban kyntiew kyrdan ruh ia kane ka skul sha ka Higher Secondary bad ruh ban don noh ka English Section bad ban pynurlong ia kane ka thong, ki la rai ban ia shong pyrkhat naduh ka Balang, ki bor pyniaid skul bad ka shnong khnang ba kane ka jingthmu ba bha ban dang kyntiew ia kane ka skul kan sa urlong bad kan sa long kaba jop.
