Ki nongtrei ka SSA Non-teaching staff ha ka lama ka All Meghalaya SSA Non-Teaching Staffs’ Association (AMSSANTSA), hadien ka jingiakhih ba la poi sha ka 21 sngi, ki la weng noh ia kane ka prokram ia khih ha madan Malki, kba dei hadien ba ka sorkar jylla ka la mynjur ban ia pynbeit ia ki jingdawa bad khamtam ka jingdwa ba pynkiew ia ka tulop jongki.
Ka sorkar jylla kan sa pyntreikam noh da ka jingsiew ba thymmai na ka bynta ki SSA non-teaching staff ha kaba kin sa pyntreikam naduh ka 1 tarik u Iaiong 2024.
Haba mynjur ia ka jingkular ka sorkar, ka president ka seng ka Kong Jennyfer Synrem ka la ong, “ ngi la rai ban weng noh ia ka jingiakhih, kaba dei hadien ba ki jingdawa ki la urlong ba kynthup ban kyntiew ia ka Allowance kaba 2% na ka bynta kito kiba la trei slem bad 5% ban pynkiew ia ka tulop man la u snem. Wat la ngim ioh 80% ban kyntiew ia ka tulop, hynrei ngi hun ba ka sorkar jylla ka la rai ban pyntreikam ia kata ka rukom treikam kaba thymmai”.
Ka la ong ruh wat la ki riti treikam ka Rationalization Committee, ha kaba ma ki ruh ki dei ki dkhot hapoh ka committee, ka don ia ka bynta kaba khraw ba ia kren sani halor ki jingsiew bad mynta ngi la ioh ia ka jingsiew kaba kham pher kaba long katkum ka jingslem ha ka jingtreikam bad ym shu kumba long ha ki por ba leit noh ha kaba kiba wan trei thymmai ruh ki ioh kajuh ka jingsiew kumba ioh lem kito kiba la trei 18 snem shaneng.
Haba jubab ia ka jingkylli, ka kong synrem ka la ong ruh ba ki sngewkmen ba ka sorkar kan pyntreikam noh ia ka jingsiew ba thymmai ka ban sa pyntreikam naduh ka 1 tarik u Iaiong 2024 bad ngi ai khublei ruh ia ka sorkar jylla ha kaba ha ka jingialam u Conrad K. Sangma ki la lah ban pynbeit ia kine ki mat jingdawa jongngi lyngba ka Committee.
Ka la bynrap ruh da kaba ong, ba dang shen ki la kyntait ia ka rai jong ka sorkar ban kyntiew ia ka tulp kaba 25%, ka dei namar ba shiteng na ki nongtrei non-teaching staff kim shym la hap lang ha kane ka thup bad kam long ruh kaba shai namar kam shym la don ka jingpynkiew tulop la kumba 8 snem ha ki snem ba leit noh.
Shuh shuh, ka la pyntip ruh halor ka jingmynjur ka sorkar ban pynbeit ia kitei ki jingdawa, ngim donkam shuh ban mih sha madan ban ia khih bad ngi la rai ban weng noh ia kane ka jingiakhih bad ban bteng noh ia ka jingshakri kumba la bynshet da ka sorkar, ka la bynrap.
