U Phil Foden, uba dei u khlur ialehkai ka ri England bad uba ielehkai na ka Manchester City ha ka English Premier League, u la khur ia ka khusnam kum uta u rangialehkai ba kynsai eh ha ka Professional Footballers’ Association (PFA) Player of the year Award.
Ha ka sngi ba la sam ia ka (PFA) Player of the year Award kaba la long ha Nongbah Salford jong ka ri England, la sam ruh ia kawei ka khusnam kaba la sam sha ki rangialehkai ba dang khynnah bad kaba la tip kum ka PFA young player of the year, ha kaba u Cole Palmer uba ialehkai na ka Chelsea Football Club, u la ioh ban khur ia katei ka khusnam.
Ha ka thup ban ioh ia ka khusnam PFA Player of the year Award, ki la don shibun kiba la rung sha ka thup ba khur ia katei ka khusnam, kata ki kynthup ia u Erling Haaland bad u Rodri kiba ialehkai na ka Manchester City, u Martin Odegaard na Arsenal FC, u Cole Palmer na Chelsea FC bad u Ollie Watkins uba lehkai na ka Aston Villa FC.
Ia kaba kum katei kajuh ka khusnam la sam ruh sha ki thei ialehkai, ha kaba ia ka khusnam PFA Women’s Player of the year, la khur da ka Khadija Shaw kaba lehkai na ka Manchester City Women, katba ha ka PFA Women’s Young Player of the year la ioh da ka Grace Clinton kaba lehkai na ka Tottenham Women.
