Hadien ka jingud jingnam na kiba bun ki nongshong shnong bad ki nongshong dukan hapoh ka Nongpoh Town Shopping Complex, ka seng Ri Bhoi People Councils’s (RBPC) mynta ka sngi ka la leit syndon ba jurip ia katei ka shopping complex ha Nongpoh khnang ban tip ia ka jingshisha kumba la pynpaw da ki paidbah.
Ha kane ka jingleit jurip la ialam da u President ka RBPC u Bah Jayson Lennox Nongrum lem bad ki dkhot ka seng, ha kaba ki la leit ban jurip ia katei ka shopping complex kaba ki la lap shibun ki jingduna.
Kumba la lap da ka seng, ha kane ka jingleit jurip, ki don shisha shibun ki jingduna, naduh ka jingby biag ka painkhana paidbah, ka jingbym biang ka um, ka jingbym biang ka bording ilektrik na ka jingbymtreikam ka Generator bad khamtam ka jingbret pathar ia ki jaboh kaba ktah ia ka koit ka khiah ki nongshong dukan bad ruh ki paidbah kiba leit leit ha katei ka iew.
Halor kine ki jinglap ka seng ia kiba bun ki jingduna ha katei ka Shopping Complex, u President ka RBPC u Bah Jayson Lennox Nongrum u la ong ba ka seng kan sa leit ban ia kynduh bad pynsngew syndon sha u Deputy Commissioner ka Ri Bhoi bad kum ka seng ka la pynpaw ruh ba ka jingdon katei ka Shopping Complex ka dei ban ai jingmyntoi ia ki paidbah bad ym ba ki paidbah ki mad jingeh na ka jingbym shim khia ha kaba pynbiag ia ki jingdonkam hapoh katei ka shopping complex.
Halor kine ki jingduna ha katei ka Nongpoh Town Shopping Complex, ki nongshon dukan ruh ki la pynpaw ia ka jingeh jongki, halor shibun kita ki jingduna, kiba kynthup ka jingbym don painkhana kaba biang, ka jingbym biang ka um, ka jingbymm biang ka bording ilektrik bad ruh ka jingbret pathar ia ki jaboh kaba la wan rah ka jingsma iwtung, ha kaba kim banse ban shong namar ba ym don lad shawei.
