Ka Shillong Lajong Football Club ka la pynthikna ialade ban rung sha ka Semi-Final ha ka Durand Cup 2024, kata hadien ba ka la lah ban pynliem noh pyrshah ia ka Emami East Bengal Football Club da 2-1.
Ka kylla step jong ka jingiakhun, ka Shillong Lajong FC, ka la ioh ban lamkhmat ia ka jingiakhun lyngba ka kol kaba la thep da u M. Silva ha ka minit ba 8 jong ka jingiakhun bad kaba la neh tad haduh ba la kut jong ka jingiakhun ha ka kylla step.
Haba bteng ka kylla miet jong ka jingiakhun, ka Emami East Bengal FC ka la ioh ban pyniakhaid ia katei ka kol lyngba u Nandha uba ka thep ha ka minit ba 77, hynrei katba ka jingiakhun ka la iaid shakhmat, ka Shillong Lajong FC ka la ioh ia ka kabu ban thep kol lyngba u Figo Syndai, uba la thep ha ka minit kaba 84 bad kaba la neh haduh ba kut ka jingiakhun, kaba la pynlong ruh ia ka Shillong Lajong FC ba kan pynliem noh ia ka Emami East Bengal da 2-1 bad ban pynthikna ruh ialade ban rung sha ka Semi-Final ha ka Durand Cup.
Haba phai sha ka jingiakhun, la dei shisha ban ai jingiaroh ia ki paidbah kiba la leit ban ai jingkyrshan sha ka Shillong Lajong FC, kiba la ai ka jingkyrshan naduh basdang haduh ba kut ka jingiakhun bad kaba la pynkmen eh ia ki nongkyrshan ka dei ba ka Shillong Lajong ka la jop ia ka jingiakhun bad rung sha ka Semi-Final, ia kaba kan hap ban iakhun pyrshah ia ka North East United Football Club.
Kaba itynnad eh ha ka jingiakhun Quarter Final ha ka Durand Cup, ka dei ba ia ka Shillong Lajong FC la bun kiba mihkhmat na ka kynhun ki dei ki samla Khasi, ha kaba ki la iakhun tyngeh bad kiba la pyni shisha ia kata ka sap ha ka kam ialehkai phutbol bad kiba la lah ban iakhun pyrshah ia ki rangialehkai ka East Bengal, kiba dei ki rangialehkai kiba la ioh ia kata ka jingshah hikan pyntbit kaba biang.
