U Superintendent of Police ka East Jaintia Hills District, u Giri Prasad ha ka jingpyllait khubor mynta ka sngi u la pyntip ba hynne ka step phyrngap ha ka por kumba 4:00 baje eiei, ki pulit jong ka Ratachera Anti Infiltration ryngkat bad ki nongtrei jong ka Umkiang PPP ki la pynlong ïa ka jingtalasi kali ha Ratachera ban khynra ïa ki mynder bad ioh ban bat ïa kawei ka bos (night super) kaba don ïa ka registration number AS12E 6399 kaba wan na ka liang Silchar jong ka jylla Assam.
Ha ka jingkhynra ia katei ka bos night super, ki bor pulit, ki la ioh ban kurup haduh 7 tylli ki synduk sabon ki ba la thep ia u drok Heroin uba khia kumba 79.81 gram na uwei u briew uba la tip kyrteng kum u Md Siraj Ali, 35 snem ka rta na Forest Colony, Polo, Shillong.
Halor kane ka jingjia, na ka liang ki bor pulit ki la pynngat noh ia utei u Md Siraj Ali hapoh ki kyndon jong ka Narcotic Drugs & Psychotropic Substances (NDPS) Act.
