Ka Federation of Khasi Jaintia & Garo People (FKJGP) Mawhati Circle, ka la pynkynmaw biang ia ka sorkar jylla kata ia u Conrad K. Sangma, Myntri Rangbah ka sorkar jylla bad ruh ia u Bah Charles Marngar, MLA Mawhati, ba ka jingkular ban pynurlong ia ka Mawhati C&RD Block bad ia ka surok ba 40km na Sonidan Umsiang, ka dei ban urlong beit bad ym dei tang ban shu kular kai sha ki paidbah ka Mawhati Constituency hi baroh kawei.
U Samla Anthony Lamare, uba long kum u Asst. General Secretary ka FKJGP Mawhati Circle, u la ong ba ka nongrim kaba la pynlong ia ka seng ba kan hap kren ne pynkynmaw biang halor katei ka mat, ka dei hadien ba ha kine ki khyndiat sngi ba la dep, ba u MLA Mawhati u la leit ban kynduh ia u Myntri Rangbah ka sorkar jylla ban pynsngew halor ka Mawhati C&RD Block bad kumjuh ruh halor ka surok na Sonidan sha Umsniang, ha kaba ka jubab na u Myntri Rangbah ka long ba kitei ki mat ba donkam eh na bynta ki paidbah ka Mawhati Constituency ki dei ban urlong beit.
Shuh shuh, u la ong ruh ba halor katei ka mat, kata ka Mawhati C&RD Block bad ka surok shaduh Umsiang, ki la dei ki mat ba ka seng ka la iai pynsngew sha ki nongmihkhmat bad kumjuh ruh sha ka sorkar, namar ki dei kiba donkam eh hapoh ka Mawhati Constituency khamtam eh ba ka la dei ka Constituency kaba la heh la iar bha bad kaba la bun ki shnong ki thaw.
“Kumba ka long mynta ki don shibun ki shnong kiba don ha ka thain Umsiang bad khamtam sha ki thain Amdubighat, ki dei ki shnong kiba la jngai sha Umsning Block bad nalorkata sa ka jingsniew ka surok na Umsiang sha Sonidan, ka la wanrah jingeh shisha ia nongialam shnong na katei ka thain ba kin beh shaduh Umsning Block, na bynta ban pyndep ia ki kam shnong kam thaw kiba iadei bad ka Block” ong u Samla Anthony Lamare.
Kumba ka sorkar lyngba u Myntri Rangbah, uba la kular ban pynurlong ia ka Mawhati C&RD Block bad kumjuh ruh ia ka surok na Sonidan sha Umsiang, ka seng ka ai ka jingiaroh ia ka sorkar bad ia u MLA uba la shimkhia halor katei ka mat ba donkam eh ki paidbah ha katei ka thain bad lada kitei ki jingkular kin urlong shisha, kan da dei shisha ka jingkyrkhu kaba khraw eh ia ki paidbah ka thain Mawhati hi baroh kawei, u la ong.
Namarkata, na ka liang ka seng ka kyntu ia ka sorkar jylla, ba kumba ka la kular halor ka Mawhati C&RD Block bad kumjuh ruh halor ka surok na Sonidan sha Umsniang, na ka liang ka seng ka sngew ban iai ban ia ka sorkar jylla ba ka dei ban pyndep beit, khnang ba kan long ka jingmyntoi ia ki paidbah ha katei ka thain hi baroh kawei, u la bynrap.
Top of Form
Bottom of Form
