Ka dei ka khubor kaba pynkmen eh ïakiba bun ki riew ieid phutbol ha ka jylla, ba kin ioh sakhi da la ki jong ki khmat ia ka jingïakhun Semi-Final ha ka Durand Cup 2024 bad kata ka dei hadien ba ka All India Football Federation (AIFF), ka la pynbna ban pynthikna syndon ba ka jingiakhun Semi-Final hapdeng ka Shillong Lajong FC pyrshah ia ka Northeast United FC ba kan long ha Madan JN Stadium ha ka 26 tarik mynta u Bnai.
Lah ruh ban kdew hangne, ba katkum ka jingpyniaid ha ka Durand Cup, la phiah ba ki kynhun kiba la rung sha ka thup Semi-Final, ka jingiakhun hapdeng ki kynhun ka dei ban long ha Vivekanandaa Yuba Bharati Krirangan Stadium ha Kolkata, hynrei kumba ka long mynta ha ka jingpyllait khubor kaba thikna jong ka Durand Cup lyngba ka X, la pynpaw ba ka jingiakhun Semi-Final ba nyngkong kan long ha madan JN Stadium Polo.
Lehse lyngba katei ka jingpynkylla jaka ia ka jingiakhun Semi-Final ha ka Durand Cup bad ba ka jingiakhun hapdeng Shillong Lajong pyrshah ia ka Northeast United ba kan sa long ha Madan JN Stadium, kan da long shisha kaba la pynkmen ia ki nongkyrshan ka Shillong Lajong.
