Ka kynhun ialehkai ka Nongjri Presbyterian Secondary School, kaba la mihkhmat ia ka jylla ha ka U-15 International Subroto Cup Football Tournament kaba la long ha Banggalore, ki la bteng ban khur ia ka namjop, hadien ba ki la lah ban pynliem noh ia ka ISSO ka kynhun ialehkai ka Maharashtra da 7-0.
Kum ban shu kdew hangne, ha ka jingiakhun kaba nyngkong ka Nongjri Presbyterian SS, ka la lah ban pynliem ia ka Srilanka da 6-0, bud kata pat sa ka jingiakhun kaba dei ban long pyrshah ia ka Madhya Pradesh, hynrei ka Madhya Pradesh kam ioh shuh ban iakhun, namar ba ki khynnah ba ka la phah sha katei ka lympung ialehkai, ki dei kiba la heh palat ka rta jong ki bad kaba la pynjop suk ia ka Nongjri Presbyterian SS.
Ka jingiakhun kaba mynta ka sngi hapdeng ka Nongjri Presbyterian SS pyrshah ia ka ISSO, ka Nongjri Presbyterian ka la lah ban pynbam kput haduh 7 kol la noh bad ha katei ka jingiakhun, u Chandip Chetri u la khur biang ia ka Hat-trick da kaba thep haduh 4 kol marwei, nangta u Banteilang Malieh, u Shanbok Basaiawmoit bad u Iasynrop Syiemlieh, ki la ioh ban thep mar mar shi kol.
Ka jingiakhun kaba bud jong ka Nongjri Presbyterian SS kan dei lashai ka sngi pyrshah ia ka DNH&D&D na ka jylla. Kane ka dei katkum ka jingpyntip da ki nongialam ia ka kynhun ialehkai U-15 ki khynnah shynrang sha Bangalore.
