U President ka Meghalaya Pradesh Congress Committee (MPCC) u Bah Vincent Pala hynne ka sngi ula pynbna baka MPCC kan ujor sha iingkashari pyrshah ia 3 ngut ki MLA ba pyniasoh ialade shaka National People’s Party (NPP).
Ia kane u Bah Pala ula pynbna hadien ka jingialang ba kyrkieh jong ka MPCC ha Shillong ban iakren halor ka jingphet seng ki 3 ngut ki MLA bad haka juh ka por ban iakren kam halor ka jingpynkhreh iaka ilekshon MDC ha Khasi Hills Autonomous District Council (KHADC) bad Jaintia Hills Autonomous District Council (JHADC).
Lah ban kdew ba haka 19 tarik Nailar, 3 ngut ki MLA na ka seng Congress ba kynthup u MLA ka Nongstoiñ Constituency u Bah Gabriel Wahlang, u MLA ka Mawhati u Bah Charles Marngar, bad u MLA ka Umsning u Dr Celestine Lyngdoh kila leit pyniasoh shaka NPP.
“Kumta ha ka jingialang kaba la long mynta ka sngi, ngi la pynshai ia ki nongtrei ka MPCC ba ngi lah ban ujor shaka iingkashari pyrshah ia baroh 3 ngut ki MLA ba phet seng. Ngin sa pan jingmut shwa na ki nongiasaid ain ban peit, kiei ki jingmyntoi bad ki jingduhnong kiba lah ban ai jingmyntoi ia ka seng bad ia ki paidbah hi baroh kawei” la ong u Bah Pala.
U bah Pala u la kynnoh ba hadien ka jingphet seng ki 3 ngut ngut ki MLA, ka kdew shai ia ka jingiadei kaba khlain bha hapdeng ka Bharatiya Janata Party (BJP) bad ka NPP ha Meghalaya.
U la ong ba ka thong jong ka BJP bad ka NPP ka long ban iohi ba ka Congress ka dei ban jah kyrteng napoh ka Ri India kynthup na jylla Meghalaya.
“Kum ka nuksa, kane ka la jia ha Jharkhand, kumba phi lah ban ïohi kumno ka BJP ka pyrshang ban thied ïa ki MLA. Kane kala jia ha Himachal, ki la pyrshang ruh ha Karnataka, ka jia ha kiba bun ki jaka ba synshar ka Congress” ula kynnoh.
