“Ka jingkynrei u Drok ha ka jylla bad ka shongkha khleh bad ki bar jylla, ka dei ka jinghiar thma ba jar jar ban pyntroin ne pyntlot ia ka jaid bynriew jongngi” ong u Bah Donboklang Kharlyngdoh haba kren ha ka jingialang ban pynbam smai ki nongialam ka HCY Pariong Area Unit hapoh ka Mawthadraishan Circle kaba la long mynta ka sngi ha ka Hall ka Skul Run Thabah Memorial Secondary School, Pariong.
Kum ka jingai mynsiem ia kine ki nongialam ba thymmai ka HYC ha Pariong Unit, u Bah Donboklang Kharlyngndoh, u la ong ba ka seng HYC mynta ka ieng skhem ban pynduhjaid ia ka jingkynrei jong u drok hapoh ka jylla bad dei namar kane ka daw ba ka seng ka dang pyniar ia ka shnat treikam khnang ban lah ban pynduhjaid ia u drok uba la kynrei bad uba la pynjot ia bun ki samla ba lui lui jong ka jaid bynriew jongngi.
U la ong ruh ha ka jinghiarthma pyrshah ia ka jingkynrei u drok, ka seng ka la lah ban phah haduh 100 tam ngut ki samla ba la ngop ha u dork ban leit phah sumar sha ki Rehabilitation centre nalor ka jingsneng ka jingkraw, namar kum ka seng haba hiar thma pyrshah ia u drok kam mut ba ka isih ia kito ki samla ba la ngop ha u drok, hynrei ban pynkylla ia ka jinglong jingman jong ki sha ka jingim kaba thymmai.
U la kren ruh halor ka shongkha shongman ba bun ki bar jylla ki ialeh ban bsuh khlieh ha ki kam kamai kajih da kaba shongkha shongma ia ki samla Khasi jongngi bad kane ka dei kawei na ka jingma kaba khraw ha kaba ka jingthmu jongki kam dei kaba ki wan ri wan lum, hynrei tang ban ioh bsuhkhlieh ha ka kam khaii pateng ban kjied lut ia ka spah ka phew kaba don ha kane ka jylla baieid jongngi.
Namarkata, u la kyntu ia kine ki nongialam kiba la wan ban pyniasoh sha ka seng ba kin long kita ki shipai ba shlur ka jaid bynriew, namar lada kum ki samla kim iakhun pyrshah ia kane ka jinghiar thma ba jar jar jong u drok bad ka shongkha shongman da ki bar jylla, kane kan sa pyntroin shisha ia ka jaid bynriew jongngi.
Ha kane ka sngi, u Vice President ka sengkmie u Bah Donboklang Kharlyngdoh u la shim ruh ia ka bynta ban pyntian smai ia kitei ki nongialam ba thymmai bad la sakhi lang ruh ha kane ka sngi da ka jingdon lang u U President ka HYC NWKHD U bah Joplang Kharnanaior ,u President ka HYC Mawthadraishan U samla Shembor Langrin, u Sordar ka shnong Pariong ,ki samla jong ka thain bad kiwei kiwei.
