Ka Pharmacist Association of Meghalaya (PAM) ka la phah da ka Dorkhas sha ka Myntri ka tnat koit ka khiah ka Kong Ampareen Lyngdoh ha kaba ia dei bad ka jingbym iohkam ia ki samla pule bad kiba la pyndep ia ka jingpule jong ki ha ka kam Pharmacist.
Haba kren bad ki lad pathai khubor, u president ka PAM, u Bah Emos John Syiemlieh u la ong ba ka seng ka la kala pan jingtip da ka RTI ha kaba ia dei bad ka jingbym thungkam Pharmacist ha ka jylla.
U Bah Emos u la iathuh ruh ba ka seng la kyrpad ia ka Myntri ka tnat ka koit ka khiah bad ia baroh ki nongthaw ain ban iakren halor kane ka mat hapoh ka iing dorbar thawain jong ka jylla Meghalaya.
“Katkum ki jingtip ba ngi la ioh lyngba ka RTI haduh kine ki sngi ym shym la don kano kano ka jingpynrung kam lyngba ka jingpynbna ba la shim da ka Sorkar na ka bynta ka kam Pharmacist ba la mynjur ha ka Directorate of Health Services” la ong u bah Emos.
Ha ka memorandum ka seng ka la kyntu ia ka Myntri ban sdang ia ka jingthung kam kaba hok bad kaba kynthup ia baroh da kaba la shah ia baroh kiba la pydnep iaka jingpule pharmacist.
Ka Association ka la kyntu ia ka Sorkar ba ka dei ban pynbun ia ki lad ai kam ai jam ia ki samla kiba la pyndep ia ka jingpule Pharmacy da kaba seng ia ki Pharmaceutical Industries ha kane ka jylla.
“Ngi kyrpad ban pynbun shuh shuh ïa ka bor briew jong ki nongai dawai (Pharmacist) ban pynbiang ïa ki kyndon jong ka IPHS ha baroh ki jaka kum ki district hospital, ki CHC, ki PHC bad ki Sub-Centre” ong ka seng.
