Ka Nongjri Presbyterian Secondary School kaba la mihkhmat na ka jylla ha ka U-15 International Subroto Cup kaba la long ha Bangalore, ka la pynthikna ialade ban rung sha ka Semi-Final, kata ka dei hadien ba ka la lah ban pynliem noh pyrshah ia ka Army Boys Coy da 2-0.
Kumba ban shu kdew hangne, ba ha ki jingiakhun ba la leit, ki rangialehkai ka Nongjri Presbyterian SS, ki la lah ban pynliem da kaba thep bun kol pyrshah ia ki skul ba ki iakhun pyrshah, hynrei ha ka jingiakhun pyrshah ia ka Army Boys Coy, ka dei ka jingiakhun kaba kham eh, namar ki dei ki khynnah kiba la ioh ia ka jingshah hikai kaba biang.
Ia ki kol na bynta ka Nongjri Presbyterian SS, la thep da u Iainehskhem Warjri bad u Chanjip Chetri, kiba la ioh thep mar shi kol bad kaba la pynlong ia ka Nongjri Presbyterian SS ba kan pynliem noh ia ka Army Boys Coy da 2-0.
Lyngba katei ka namjop, ka Nongjri Presbyterian SS kan sa iakhun semi-final pyrshah ia ka Bangladesh bad lada ki jop, kin sa pynthikna ialade ban rung sha ka phianal ha ka U-15 International Subroto Cup.
