Ki nongshong shnong ka Umroi Madan ki la mih ban pynshai padibah halor ka jingkynnoh u rangbah shnong bad ki nongialam Shnong ba ki la rah ia kane ka mat sha u Deputy Commissioner ka Ri Bhoi halor ka surok 4-lane na Umiam sha Malidor, kaba ktah ia ka tyllong umbam umdoh ka shnong khlem da pyntip ne kynjoh ktien shwa sha ki bor nongialam Shnong.
Haba kren sha ki lad pathai khubor ha ka sngi Saitjain, u Bah C.L Mashari bad u Bah T. Marbaniang ki la mih ban pynshai paidbah ba ka jingleit jongki sha ka ophis u deputy commissioner ka Ri Bhoi kam dei satia ba ki pyrshah ia kane ka jingwan ki kam pynroi kata ka surok 4-lane, hynrei kum ki nongshong shnong ki la leit sha u Deputy Commissioner ban ai jingthoh ka dei namar ba ka jingpyniaid ia ka surok lyngba ka tyllong umbam umdih ki paidbah nongshong shnong kan ktah jur, namar kum ki nongshong shnog ka Umroi Madan kim don tyllong um pat shawei lada shah ktah katei ka tyllong um ba ki paidbah ki bam ki dih tnag na katei ka tyllong um.
Na ka liang u Bah Masharing u la ong ruh ha ka jingshisha katkum ka rukom ia kane ka mat la dei ba rah ha ka Dorbar Shnong bad la ju don ka dorbar shnong shisien shisnem bad la dep ruh ban pynlong ia kane ka durbar kut snem, hynrei u rangbah shnong bad ki nongialam shnong kim shym la pynpaw satia halor akne ka phang bad haba ki paidbah pat ki la ia khih ki kynnoh pynban ba la shu leh stad ne khlem burom ia ki nongialam shnong ka long kaba ym lah ban pdiang.
U la ong ruh ha ka jingshisha na ka liang ka shnong ki la dep ruh ban phah ia ka jingthoh sha u Deputy Commissioner ka Ri Bhoi halor ka jingpyniaid ia kane ka surok 4-lane naduh ka 23 tarik u Naiwieng 2023 bad mynta la jan shisnem ki khlem pyntip ei ei sha ki paidbah bad wat ha ka dor kut snem ruh ki khlem pynpaw satia halor kane ka kam bad hadien ba la ia khih pat da u paidbah ki kynnoh kylla ba kim burom ia ki nongialam shnong ka long kaba bakla.
Naduh u Bah C.L Masharing bad u Bah T. Marbaniang ki la pynpaw shai ba kam don kano kano sha lyndet ba ki pyrshah ia ka jingpyniaid surok na ka tyllong umbam umdih ka shnong Umroi Madan, hynrei kaei kaba ki pyrshah ka long ba ki hap ban pyrkhat na ka bynta ka lawei ki khun ki kti bad lada pyniaid ia ka surok na katei ka tyllong umbam umdih lada ka duh noh ka tyllong umbam umdih mano pat ban shim ia ka jingkitkhlieh lada kum ki paidbah ki hap mat ia ka jingkyrduh jong ka umabam ka umdih.
Kumba la pynshai da ka shnong ha ki lad pathai khubor, la ong ba kin sa pynkynriah ia ka jingiaid ka surok 4-lane haduh 50 ne 60 meter bad namar katei ka dei ka ranap lum, lada shah ktah ne rngat noh ka tyllong um, ki lah moh ban shim ia ka jingkitkhlieh, namar lada shna ne tih surok ki hap beit ban tih ia ka surok bad khlem pep kan ktah beit ia ka tyllong umbam umdih, buh jingkylli kine ki rangbah.
Ki la pynshai bniah ruh ba kum ki nongialam shnong kim dei ban don jingpher namar kum ki riew rangbah ki hap ban kren ia kane ka mat kaba ktah ia ka kam iap ka kam im jong ki paidbah ka shnong, namar ia ka surok ngi lah ioh bun tylli ki surok bad lada duh noh ka tyllong um kane ka ktah ia ka pateng ki khun ki kti jongngi.
Shuh shuh, kitei ki riew rangbah ka shnong ki la ong bad pynshai ba kim pyrshah ia ka jingwan ka surok 4-lane kaba dei ka kam pynroi, hynrei ki pyrshah tang ban nym shah ktah ka tyllong um bad lada ia kane ka jingpyniaid ia ka surok 4-lane kan ktah na ka tyllong um kin bteng ka jingpyrshah bad ia kane la pysnngew ruh da kiba bun ki riew rangbah bad ki piadbah nongshong shnnong kiba pyrshah ban shah ktah ka tyllong umbam umdih, ki la bynrap.
