Ka Nongjri Presbyterian Secondary School, ka skul na Ri Bhoi, kaba la mihkhmat ia ka jylla ha ka U-15 International Subroto Cup 2024 ha Bangalore, ka la rung sha ka Final bad kata ka dei hadien ba ka la lah ban pynliem noh ia ka Bangladesh da 2-1 ha ka jingiakhun Semi-Final kaba la long mynta ka sngi ha Bangalore.
Ha ka jingiakhun Semi-Final kaba la long mynta ka sngi, ka Nongjri Presbyterian SS, ka la ioh nyngkong ban pynkhihjar kaba la wan ha ka dur jong ka Penalty ia kaba la thep da u Marc R Marak, uba la thep ha ka minit ba 36 jong ka jingiakhun, katba ka Bangladesh ka la lah ban pynphai da u Nafid ha ka minit ba 43 jong ka jingiakhun.
Haba bteng ka kylla miet jong ka jingiakhun, ka Nongjri Presbyterian SS, ka la ñion tyngeh bad ha ka minit ba 58 ka la ioh ban thep kol ia kaba la thep da u Namebanlam Nongkseh.
Ia ka kynhun ialehkai ka Nongjri Presbyterian Secondary School, la ialam da u Pynkhrehlang Nongkseh kum u Coach bad u Jeffery Warlarpih kum u Manager. Ha ka lynti iakhun ka Nongjri Presbyterian Secondary School, ka la lah ban pynliem da 6-0 pyrshah ia ka Srilanka, 7-0 pyrshah ia ka ISSO, 8-0 pyrshah ia ka Dadra & Nagar Haveli and Daman & Diu, katba ha ka Quarter Final ka la lah ban pynliem noh ia ka Army Boys Company 2-0 bad tad haduh ka jingiakhun Semi-Final kaba mynta ka sngi.
