Ka District Legal Services Authority (DLSA) West Khasi Hills District, Nongstoin mynta ka sngi ka la pynlong ia ka prokram ai jinghikai kyrpang shaphang ki ain bapher bapher kum ki lad jingiada ia ki paidbah ba ki dei ban tip ia ka ain, ha kaba la pynlong ha SGSY Hall, Nongshillong kaba hap hapoh ka Mawthadraishan C&RD Block, Eastern West Khasi Hills District.
Ki nongai jingkren ha kane ka sngi ki kynthup ia u Bah D.D Diengdoh, uba la kren shaphang ka ain ba la tip kum ka ‘The Sexual Harassment at Workplace (Prevention, Prohibition and Redressal) Act, 2013’, kaba dei ka ain kaba kyrpang ban ai jingiada ia ki kynthei ha kinno kino ki jaka trei jongki, ba kim dei ban shah pyndik ne shah thobor ia ka long kynthei jongki.
U la pynshia ruh halor ki lad jingiarap ba ki kynthei ne ki dei ban ioh ia ka jinglutksan lada ki shah lehbein ne shah thom bor la ha ing ha sem, ne ha ki jaka treikam ne ha ki jaka paidbah. u la pynshai ruh halor ka domestic violence act, kiba dei ki jingshah lehbein ki longkmie ne ki samla kynthei ha ki ing ki sem.
Na ka liang ka kong K. Marwein kum ka LAC ka la kren haphang ka Meghalaya Community Participation and Public Services Audit Act 2017 bad ka Meghalaya Community Participation and Public Services Audit Act 2019.
Ha kane ka prokram la wan sakhi da ki nongtrei ophis na ki department bapher bapher jong ka dong ka thaiñ, ki Self Help Group, BRP Mawthadraishan, ICDS, ki Sordar bad kiwei de. Lyngba kane ka prokram kala don ruh ka jingïakren kaba la wanrah shibun ki jingtip bad ki jingmyntoi ïa baroh kiba wan sha katei ka prokram ban tip kham bha shaphang kita ki ain ba ai jingiada ia ki paidbah.
