U Symbud Myntri Rangbah ba khmih iaka tnat kam pohing u Bah Prestone Tynsong ula pyntip ba ha kane ka taiew un lum biang ka jingïalang bad ki ophisar ka tnat pynroi sor halor ka jingkynriah iaki longïing na Them Iew Mawlong.
Ia kane u Bah Prestone u la jubab halor ka jingpan por biang ka Harijan Panchayat Committee (HPC) ban shim rai khatduh ban mih noh na Them Iew Mawlong.
“Mynta ka taiew, ngan lum biang iaka jingïalang jong ka Sorkar bad hadien kata ngin sa lah ban jubab halor ka jingpan por biang ka HPC” la ong u Bah Prtestone.
Lah ban kdew ba ka 26 tarik Nailar 2024 kadei ka sngi ba khatduh iaka HPC ban pyntip iaka rai ba khatduh naka bynta ban kynriah noh na Them Iew Mawlong, hynrei kala pan por biang naka Sorkar Jylla daka ba kam ba ka por ka long kaba lyngkot palat ban shim iaka rai khatduh.
Haba kylli u Bah Prestone ula ong “Hoid ngi la ai por khatduh iaka HPC hynrei kala phah biang daka shithi ba ki donkam por biang”.
“Iaka ba mynta ngam pat lah ban ong eiei namar ka donkam biang iaka Sorkar Jylla ban ïakren hapoh ka tnat bad hadien kane ngin sa lah ban shim rai halor ka jingpan por ka HPC” ula ong.
