Ka Nongjri Presbyterian Secondary School Umsning, kaba la mihkhmat ia ka jylla sha ka U-15 International Subroto Cup Football Tournament ha Bangalore bad kaba la rung phainal ha katei ka lympung ialehkai phutbol ki skul, kan sa iakhun pyrshah ia ka Major Dhyanchand Sports College na ka jylla Uttar Pradesh, ha kaba ka jingiakhun phainal kan long ha ka por 4 baje janmiet.
Ia ka kynhun ialehkai ka Nongjri Presbyterian SS, la ialam da u Pynkhrehlang Nongkseh kum u Coach bad u Jeffery Warlarpih kum u Manager bad ha ka jingiakhun haduh ban poi sha ka Phainal, ki khynnah ka Meghalaya ki la lah ban ialehkai bha bad kiba la lah ruh ban thep bun kol ia ki kynhun ba ki iakhun pyrshah.
Ha ka jingiakhun kaba nyngkong, ki la thep da 6-0 pyrshah ia ka Srilanka, kaba bud pyrshah ia ka ISSO ha kaba ki la thep 7-0 bad ha ka jingiakhun balai pyrshah ia ka DNH&D&D ki la thep haduh 8-0.
Ha ka Quarter Final ki la pynliem noh pyrshah ia ka Army Boys da 2-0 bad ha ka Semi Final, ki la pynliem noh pyrshah ia ka Bangladesh da 2-1.
