Da ka jingbitar ki nongniah kali Autorickshaw kiba kamai ha ka thain Nongpoh ba kynthup haduh 6 tylli ki Unit mynta ka sngi ki la lum syndon da ka jingialang ha Nongpoh ban ia kren sani, kaba dei halor ka jingleh kuman u President bad ki nongialam ka Nongpoh Region Auto Owners and Drivers Association (NRAODA) sengkmie kaba dei wat hadien ba ki la ai por 15 sngi ban pynlong ia kata ka jingialang paidbah bad ki nongniah Kali Autorickshaw ha ka thain Nongpoh.
Kine ki dribar kiba la mih shakhamt ban pynlong ia kane ka jingialang da ka jingbitar ki kynthup ia ka Nongpoh Unit, Saiden Unit, Pahamrioh Unit, Shangbangla Unit, Umsawnongkharai Unit bad Marngar Unit. Kine ki nongniah kali Autorickshaw ki la pynpaw ruh ia ka jingsngewlyngngoh kaba khraw halor ka jingtreikam u President ka sengkmie bad ki la kynnoh ruh ba u la shu thiah lyngngai bad jah ia lade khlem da pynlong ia kano kano ka jingialang bad khlem da ai jingkhiein jingdiah ruh sha ki para nongniah Auto Rickshaw.
Na ka liang kine ki nongialam ki la iathuh ruh ba dei namar ba la shu thiah lyngngai, ki nongniah Autorickshaw ha ka 9 tarik mynta u bnai, da kaba shai ki la phah lyngba ka shithi sha u President ka NRAODA sengkmie na ka bynta ban pynlong noh ia ka jingialang paidbah ban ai ia ka jingkhein ka jingdiah ia ki pisa ba ki la lum na baroh na ki kali Autorickshaw ha ka thain Nongpoh, kata kaba ki ju khrong T. 10 man ka sngi.
Ki la iathuh haba khein kyllum ka jinglum pisa lada khien duna eh ruh kan long kumba 300 tylli ki kali kamai Autorickshaw ha kine kine ki 6 tylli ki Unit ba hap hapoh ka NRAODA sengkmie bad lada khein kyllum ruh ka long kumba T. 3 hajar shi sngi, ha kaba lada khein ha ka shi snem ka la poi palat T. 7 lak bad lada khein pat ha haduh 13 tylli ki snem, jingkhrong pisa ka la long palat ia T. 1 klur tam.
Ki la pynpaw ruh da kaba ong kaba la pynsngewbitar ia ki, kum ki nongniah kali Autorickshaw, ka dei namar ba utei u nongialam ka NRAODA sengkmie, ha katei ka shithi ba la phah sha u, u la pynshai pynban mynno ka sengkmie bad ki nongialam ki la iohthiah. Ki la buh jingkylli ruh lada haduh 13 tylli ki snem khlem lum jingialang bad khlem ai jingkhein jingdiah, hato kane kam dei mo ba iohthiah lyngngai bad kum ki nongniah kali Autorickshaw kiba la siew pisa sha kane ka seng ki don ka hok ban ioh jingtip shaei ka pisa ka poi bad sha pla jongno ka leit.
Namar kata, lyngba kane ka jingialang kine ki nongniah Autorickshaw ki la ai por 5 sngi ia u nongialam ka NRAODA sengkmie ba dei ban don noh ka jingialang bad kum ki nongialam ki dei ruh ban ai ia ka jingkhein jingdiah halor kane ka phang bad ruh ban pynthymmai noh ia ki nongialam kaba long na ka bynta ka bha ka miat jong ki nongniah kali Autorickshaw ha ka thain Nongpoh hi baroh kawei, ki la bynrap.
