Tang hadien ba ki nongshong shnong ka Umroi Madan, kiba la leit ruh ban jurip ruh ïaka jaka ba thmu pynïaid ïaka surok 4-Lane na Umiam sha Malidor lyngba ka shnong Umroi Madan, na ka liang ki nongialam shnong ka Umroi Madan mytna ka sngi ki la mih shakhmat ban pynshai paidbah kumba la kynnoh da kitei ki riew rangbah bad kiba la leit ruh ban ujor sha u DC ka Ri Bhoi, da kaba kynnoh ba katei ka surok 4-lane ka aiid lyngba ka tyllong um ka shnong Umroi Madan.
Haba kren bad pynshai sha ki lad pathai khubor u Bah Lamborlang Makri Rangbah Shnong bad u Bah Banshanskhem Rynjah Secretary Shnong ka Umroi Madan, ki la ong ba na ka liang ka shnong kam don jingtip satia halor katei ka jingleit jurip jongki ia ia katei ka surok 4-lane bad na ka liang ka shnong ka ap khmih lynti ia ka jingwan jurip na ka liang ka ophis u DC ban wan jurip kumba ki la ujor sha u DC kaba u la kular ban pynlong ia ka jingjurip ia katei ka jaka.
Haba pynshai la katei ka surok 4-lane kan ktah ne ym ktah ia ka tyllong umbam umdih ka shnong na ka jingwan kane ka surok 4-lane, na ka liang kine ki nongialam shnong ki la pynshai ba haduh mynta ki dang ap khmih lynti ia ka jingwan jurip na ka ophis u DC bad ki la kam ruh ba kim dei kita kiba la stad lane ban batai stad ia kata ka jingktah ne ym ktah ia ka tyllong um bad kumba la pynshai ruh la pyntip ban pyllait ia ak tyllong um haduh 50 meter ka jingjngai.
Kumba la kynnoh da u Bah T Marbaniang, da kaba u la buh jingkylli kumno kata surok 4-lane kan kiew sha ka tyllong umbam umdih ka shnong Umroi Madan bad na ka liang ka shnong ka kyrpad ia u ba un wad jingtip na ka ophis u DC ka Ri Bhoi bad na ka liang ka shnong kam lah ban ai jubab. Ki la pynpaw ruh kaba bha tam hi ka long ba ngi ap ia kata ka sngi kaba u DC un phah wan ban jurip la kata ka um kan ktah ne kan nym ktah lada wan kata ka surok 4-lane.
Kitei ki nongialam ki la iathuh ruh ha ka jingshisha ha kaba nyngkong la wan ban sorjamin ia kane ka surok 4-lane na ka surok barim bad hadien pat la ioh jingtip la pynkylla ia ka jingiaid kane ka surok 4-lane bad wat la katta ruh tang mar ia ioh jingtip ki la leit ban ujor sha u DC ba kim kwah shah ktah ka tyllong um bad na ka liang u DC ruh u la dep ban ai ka jubbah ba la dep ban phah jingthoh sha ka Company NHIDCL, kaba dei ka Company kaba pyntrei ia kane ka surok bad ki la pynshai ruh ba kum ka shnong kam shym la thep satia ia ka kot ha pla bad ki la leh ia kaba donkam, ki la pynshai sha kitei ki riew rangbah.
Ki la kynthoh ruh ia u Bah C.L Masharing bad ia u Bah T. Marbaniang ba lada ka surok kan jngai kumba 50 meter na ka tyllong um la kane kan ktah ne ym ktah ia ka tyllong um ngim dei ki riew shemphang bad wa kitei ki riew rangbah ruh kim dei kiba la shem phang. Ki la bynrap ruh ha ka jingshisha na ka liang u DC u la kular ban shim khia ia katei ka jaka, hynrei balei pat kim lah ban ap satia, ha kaba ki la shu thad ia ki nongialam shnong sha ki lad pathai khubor kaba lah ban don ei ei sha lyndet khamtam u Bah CL Masharing u la dei lypa u dkhot ka Executive Committee kaba u lah ban don kata ka buit ban thad ïaki nongïalam shnong.
Shuh shuh, kine ki nongialam shnong Umroi Madan, ki la phah da ka khubor kaba shai sha kine ki riew rangabah ba ki dei ban long kum kita ki riew rangbah kiba pyrkhat jngai na ka bynta ka bha ka miat ka shnong ka thaw bad ym ban shu thad ne kawang ktieh sha ki lad pathai khubor, namar na ka liang ka shnong shen kan s alum da ka jingialang paidbah bad kymen skhe m ruh ba u Bah CL Masharing bad ki dkhot ka EC kin wan sha katei ka jingïalang ban ïashai ym ban kynthoh iwei ïa iwei kaba ktah ia ka burom bad ka ijot jong ka shnong ka thaw.
