U Symbut myntri ka jylla u Bah Prestone Tynsong mynta sngi Balang jong ka taiew u la ong, “Ka sorkar jylla ka dang wad bniah ia ka jingtyrwa na ka bynta ban wan rah ia ka Mawsynram Civil Sub Division bad ka District ba thymmai ha East Khasi Hills District.
Haba jubab ia ka jingkylli mynta ka sngi ha ka Dorbar synrai, u Bah Tynsong u la ong ba ka sorkar ka dang wad bniah ruh ia ka jingtywa ban buh ruh ia ki Community and Rural Development Block kumba la don ki jingdawa ha ki bynta bapher bapher ka jylla.
“Ka jingthmu ba kongsan ka sorkar jylla ban wan rah ia ki District ba thymmai, ki civil sub division bad ki C&RD Block, ka long ban pynsuk ia ki paidbah bad ruh ban wan rah ka jingshakri kaba jan bha hapdeng ki bor sorkar bad ki paidbah” ong u Bah Tynsong.
Haba rah ruh ia kane ka mat, u MLA ka TMC na Nongthymmai u Bah Charles Pyngrope u la ban khia ba ka sorkar kan shim khia na ka bynta ban wan rah ia ka District ba thymmai khamtam ka East Khasi Hills ka dei kawei na ka District kaba la heh bha ha ka jylla.
U MLA ka UDP na Mawsynram, u Bah Ollan Sing Sun, ha kawei ka bynta u la ong ba ka Mawsynram ka la don hok ban ioh noh ia ka civil sub-division, ha kaba ka jingbun paidbah ka la kham bun paid ban ia ka Pynursla bad Ranikor bad ruh bun ki shnong ki mad jingeh ba ki shong ki sah ha ki rnap lum.
U la ong ruh lada ka Mawsynram kan ioh ia ka civil sub division kan iarap shibun ia ki paidbah ba kin ioh jingmyntoi bad iajan bad ka sorkar ha ki kam shakri bapher bapher ban myntoi ki paidbah.
Haba sngap ruh ia kine ki mat ba la wan rah da u MLA ka Mawsynram, u Symbut myntri ka jylla, u Bah Prestone Tynsong u la pynshai ba ka jingthmu ban wan rah noh ia ka Mawsynram civil sub division ka dang don hapdeng ka jingbishar bniah da ka sorkar jylla.
U la bynrap ruh da kaba ong, shisien ba la ka sorkar ka la lah ban bishar bniah bad ba la biang nadong hadong, ka sorkar hi kan pyntip sha ki paidbah ka Mawsynram halor ka jingdonkam ka civil sub division.
