U MLA ka Nongpoh Constituency u Bah Mayral Born Syiem mynta ka sngi ha ka sngi kaba lai jong ka Dorbar synrai ha ïing dorbar thaw ain ka jylla, u la wan rah ia kiba bun ki mat bad ki phang na ka bynta ban kyntiew ia ki kam jngohkai pyrthei ha ka jylla.
Kumba la ailad da u deputy speaker u Timothy D. Shira ha ka jingiatai lyngkot ha kane ka dorbar synrai mynta ka sngi, u Bah Bah Mayral born Syiem u la pynpaw ba ka jingthmu ban kyntiew ia ka kam jngohkai pyrthei ka dei ka thong ba ka sorkar ka hap ban buh hakhmat ban ai kam ai jam ia ki paidbah ka jylla lyngba ka kam jngohkai pyrthei.
U la kren ruh halor ka jingthmu ban kyntiew ia ka kam jngohkai pyrthei, ka sorkar ka hap ban thaw shibun ki lad ki lynti naduh ka jingpynbiang ia ki lynti ki synkien, ka jingpynbiang ia ki Airport, ka jingdonkam ban buh ia ki iew rit (laybye market) ha shi lynter ka surokbah khnang ba kan long ka jingaikam ai jam ia ki paidbah ka jylla.
U la kren ruh halor ka phang ba lada kwah ban kyntiew ia ka kam jngohkai pyrthei, ba ka sorkar ka hap ban don kata ka jingiatrei lang na baroh ki liang ba kynthup naduh ki tourist taxi driver, ki tourist guide bad tourist operator, ki trai jong ka homestay khnang ba kan nym wan rah jingthud ia ka jingwan tuid ki nongjngohkai pyrthei na ki jylla ne ki ri bapher bapher sha kane ka jylla.
Shuh shuh, nalor shibu ki phang kiba u la wan rah ha kane ka Dorbar synrai, u Bah Mayral Born Syiem u la kren shai ba lada ka sorkar ka shim khia ban kyntiew ia ki kam jngohkai pyrthei, kane kan iarap shisha ban ai kam ai jam ia kiba bun ki samla ne ki paidbah kiba ym donkam don jam bad ha kajuh ka por ruh kan kyntiew ia ka ioh ka kot jongki bad ruh ia ka kan kyntiew ia ka jingioh lum khajna ka sorkar lyngba ka jingwan tuid ki nongjngohkai pyrthei sha kane ka jylla.
