Ka long shisha ka jingsarong ia ka Nongjri Presbyterian Secondary School, Nongjri na Ri Bhoi District, ha kaba ha kane ka kynti ka la ioh rah syndon ia ka nam ladhuh jong ka 63rd Edition Subroto Cup International Football tournament 2024, ba ka la ia khun phainal mynta ka sngi pyrshah ia ka kynhun na Uttar Pradesh ba la pynlong ha ASC Centre Bengaluru.
Kane ka jingjop kane ka kynhun ka la long ka jingsarong ym tang ia ka skul, ka Ri Bhoi Dsitrict bad ka long ruh ka nam bad ka burom ia ka jylla Meghalaya hi baroh kawei, ba kum ka kynhun ka la long ka lahduh na baroh ki kynhun kiba la wan shim bynta ha ka 63rd Edition Subroto Cup International Football tournament 2024.
Kane ka kynhun na ka ksul na Nongjri Presbyterian Secondary School Nongjri kala rah syndon ïaka nam lahduh haka kyrdan Sub-Junior U-15 ki shynrang hadien ba kala lah ban pynliem noh ïaka Uttar Pradesh da 3-0 kol haka jingïakhun phainal kaba la long mynta ka janmiet ha ASC Centre Bengaluru.
Haba phai sha ka jingïakhun phainal mynta sngi, ka jingïalehkai naduh ba sdang ka kylla step kala long kaba itynnad bad tang mar sien sdang ka jingïakhun ka kynhun jong ka jylla Meghalaya kala ioh ban pynkhih ïaka jar bad watla ka kynhun ïalehkai jong ka Uttar Pradesh kala pyrshang ban ïakhun dohiap kam shym la lah ban pynphai namar ka jingtbit ki rangïalehkai ka jylla Meghalaya.
Shuh shuh haka kylla miet ka jingïakhun kala nang khaam shongshit bad hapdeng ka jingïakhun kaba jur ban rah ïaka nam lahduh ka kynhun ïalehkai ka jylla Meghalaya kala ioh ban thep sa 2 tylli ki kol kaba la biang pura syndon ïaka jylla Meghalaya ban rah ïaka nam lahduh jong ka lympung 63rd Edition Subroto Cup International Football tournament 2024 haka kyrdan Sub Junior U-15 ki shynrang.
Naka liang ki bor pynïaid jong ka Subroto Cup kial sam ruh ïaki khusnam ha katei ka sngi ha kaba ka kynhun jong ka jylla Meghalaya kala ioh ïaka song pisa kaba T.4 lakh ryngkat ka trophy bad medal katba ka Uttar Pradesh kala ioh ïaka khusnam pisa kaba T.2 Lakh lem bad ka trophy bad ki medal nalor kiwei kiwei ki khusnam shimet bala sam ha katei ka sngi.
