Ka Sorkar Jylla kala thoh shaka Sorkar Pdeng ban pynrung shuh ia ki shnong ka Meghalaya kiba dei ban ioh marbam (Khaw Rashon) ha ka National Food Security Act (NFSA) khnang ban lah pynbiang marbam ia ki nong shong shnong.
Kane kadei namar ka jingdon ki nongioh mar bam (Khaw Rashon) ha Meghalaya kala nang kiew namar ka khana samari (Census) kaba khatduh kadei ba leh naduh u snem 2011.
Haba jubab iaka Call Attention bala wanrah da u MLA ka Mawkyrwat Bah Renikton Lyngdoh Tongkhar halor ka jingduh khaw ki nongshong shnong ka Domtynrong South West Khasi Hills, u Myntri ka tnat Food & Civil Supply & Consumer Affairs u Bah Comingone Ymbon u la ong “Ka Sorkar Jylla kala iai kyrpad na ka por sha ka por ia ka Sorkar Pdeng ba kan nang pynrung shuh shuh ia ki nongioh (Khaw Rashon) ha ka NFSA ban lah pynbiang marbam ia ki nong shong shnong kiba la nang kiew”.
U Bah Comingone u la pyntip ba ka jubab ba ioh naka Sorkar Pdeng ka long ba, kano kano ka jingpynkylla ha ka jingdon ki nongioh marbam rashon, ka dei kaba hap ban ap iaka khana samari ban pynmih thymmai.
U la pyntip ruh ba haka jingshisha iaka khana samari (Census) la dei ban leh ha u snem 2021, hynrei namar ka jingwan lynshop ka khlam COVID, kane ka kam ruh kala sahkut noh.
“Ka Sorkar India kala pyntip ba ka Jylla kala dep kynjoh ia u pud bala buh jong ka NFSA kaba la pynshong nongrim na ki jingkhein jingdiah jong ka SECC 2011 bad kano kano ka jingpynkylla ia ka jingsam marbam rashon kan dei kaba hap ban ap haduh ka khana samari ban pynmih thymmai” u la ong.
U Bah Comingone u la ong ba ka Sorkar Jylla naduh ki bor district ka South West Khasi Hills haduh ki ophisar ka tnat ki la ialeh katba lah ban pynrung kyrteng iaka shnong Domtynrong haka NFSA hynrei kine ki jingpyrshang kila shah ktah ha u pud bala buh daka Sorkar Pdeng haka bhah ai marbam (Khaw Rashon).
