Ban iarap phriang lem ia ki jingnang jingstad ban pynjanai ia ki lad ai jinghikai na ka bynta ki nonghikai skul bapher bapher kiba hikai naduh ki kyrdan kiba rit (Elementary Level) mynta ka 29 tarik Nailar ka Nonghikai bad ka Principal jong ka Union Christian Higher Secondary (UCC) ka Kong Baiarlin Nongrang ka la iohban pynlait ia kawei ka kot kaba la thoh halor ki lad ban iarap ban kyntiew ia ki rukom hikai ba paka ia kaba la jer kyrteng ruh da ka ‘Teacher Attitude towards Teaching Profession of Elementary Level of Education’.
Ia kane ka kot la pynlait paidbah ha ka jingialang ba la long hapoh ka Conference Hall ka UCC College Umbir, ha ka jingiadonlang u Principal ka College u Dr RM Manih, u Bah PJ Kurbah Rangbah Shnong ka Umbir, ka Baiarlin Nongrang, ka Dr. Mistilia Dkhar, ki nonghikai ka UCC bad ki bahaiing hasem.
Kumba la batai da ka Kong Baiarlin Nongrang, ka la shim ia kane ka lad ban sam ia ki jingtip jingnang jingstad ban nang pynphyrnai bad kyntiew ia ki lad jinghikai bapher bapher na ka bynta ka jingmyntoi ki khynnah pule ha ki skul bapher bapher khamtam haba sdang naduh ki kyrdan kiba rit, nangta yn sa nang pynjanai sha ki kyrdan kiba heh, ka la ong, haba ngi sdang ngi sdang shwa na ka kyrdan barit ban jam pat shaphrang. Ka la iathuh ba ka la sdang ban thoh ia kane ka kot naduh u snem 2020 ha ka por ba lynshop ka khlam COVID-19.
Ka la iathuh, ba ka la sdang ban wad bniah shwa ia ki rukom lane kita ki lad jinghikai ba ki Nonghikai ki ju ai sha ki khynnah pule naduh ki kyrdan ba dang sdang Kata ka Elementary Level, bad lyngba ki jingkylli na ki khynnah pule ba ki ju Phah lyngba ki rynsan WhatsApp, ka la nang pynbit pynbiang ia ki jingthoh jong ka ha ryngkat ki jingiarap na ki katto katne ngut kiba ka ong ba ki dei ki Guide.
La batai ruh, ba ha kane ka kot, la pyrshang ban shonshap, lyngba ki jingthoh kumno ba ki Nonghikai ki dei kita ki paia baskhem ban kyntiew ne pynlong briew ban pynphyrnai ia ka lawei ki khynnah pule, kaei ka jingkitkhlieh jong ki nonghikai, ka jingiadei jong ki nonghikai bad ki khynnah, ka jingpynkhreh hashwa ban sam ia ki jinghikai, ka jingiaishah, ka jinglong phikit bad ka jinglong babha, ka rukom ia kren ia khana bad kumta terter ba ka la shon kum ka lad ban pyntbit ia ki nonghikai.
Haba kren ha kane ka program pynlait kot, ki nongkren ki la ai ia ka jingiaroh kaba khraw ia kane ka sienjam jong ka Kong Nongrang, ban pynmih da ka jingthoh kaban batai ne ialam ia ki nonghikai kumno ban pyntbit ialade ha ka kam hikai naduh ki kyrdan kiba rit bad kiew terter shaneng shakhmat.
Ki la kdew ruh, ba dei ki nonghikai hi kiba long kita ki paia ki rynsan kiba skhem ban Pruit dak ia ka lawei kaba phyrnai u wei pa u wei u khynnah pule, bad dei na ki nonghikai kiba tbit kiba don ka jingshemphang ba ka pule puthi ruh ka kiew bad ka lawei jong ki khynnah ruh Kan iai phyrnai, da kaba kitbok ruh, ba lyngba kane ka kot ba la pynlait kan long ka Jingkyrkhu bad ka jingkyrshan ia ki nongpule, ki nonghikai ha ki skul ban kin nang iai shemphang ha ka kam kaba ki la jied da ka mon kaba la khot kyrpang ha ki.
