Ka Mynken Christian Hr. Sec. School, Bhoirymbong hynne ka sngi ki pynlong iaka ban leh burom ia ka kynhun, ki ban mih khmat naka jylla haka thup jong ki shynrang kiba hapoh ka 17 snem ka rta sha ka International Subroto Cup 2024 ka ban sa long ha Nongbah Delhi.
Ha kane ka sngi la ïa Don lang da Principal jong ka Skul U Bah Everlasting Pyngrope, Ki kynhun Seng bhalang, ki Nonghikai, ki khynnah skul lem bad kiwei kiwei.
U Principal jong ka Skul u bah Everlasting Pyngrope u la pynpaw ïaka jingkmen ba ka skul Mynken Christian Hr. Sec. School ka la ïoh ban mihkhmat ïaka jylla sha ka lympung ïalehkai ball kaba heh kaba la tip kum ka International subroto Cup, hakaba ki khynnah kin sa ioh ban ïa khun pyrshah ïa kiwei pat ki skul kiba nabar jong ka jylla.
U la pynpaw ruh ïaka jingkmen haba ioh sngew ba ka Nongjri Presbyterian Sec. School ka la long kum ka lahduh ha kane ka juh ka lympung jong ki khynnah shynrang kiba hapoh ka 15 snem ka rta bad ngi don ïaka jingkyrmen ba ka Skul Mynken ruh kan lah ban ïalehkai bha ha katei ka lympung bad ngi khmih lynti lyngba ki jingialehkai bha jong ki khynnah ngin sa lah ban wan rah sa kawei pat ka Trophy naka bynta ka jylla jong ngi.
shuh shuh, ha kane ka sngi la ai ruh ia ka jingkitbok kitrwiang ia kane ka kynhun naduh u Principal, ki nonghikai bad kiwei kiwei, kiba ki khmih lynti ba kane ka kynhun na ka skul Mynkern CHSS Bhoirymbong kan ialehkai bha na ka bynta ban ioh rah ia ka nam laduh, kaba dei hadien ba ka Nongjri PSS ka la ioh rah ka nam lahduh jong ka international subroto cup 2024 ha ka under-15 kaba dang shu dep shen ha Bengaluru.
