U Nongialam ka Voice of the People’s Party (VPP) u Bah Ardent Miller Basaiawmoit hynne ka sngi u pynpaw ka jingbynniaw halor ka jingshah kyntait ban iakren hapoh ka iingdorbar thawain halor ka jingrem ki marbam hapoh Meghalaya.
Haba kren sha ki lad pathai khubor u Bah Ardent u la iathuh ba haka jingshisha u la buh daka Zero Hour Notice ban iakren halor ka jingrem ki marbam hapoh Meghalaya naduh 24 tarik Nailar hynrei u Lamphang ka iingdorbar u la pynkylla iaka Zero Hour Notice sha ka Call Attention haka ba u Myntri ba khmih iaka tnat Supply, u la shu buh iaka jubab hapoh ka iingdorbar.
“Kane ka mat ka long kaba donkam bha namar ka ktah ia baroh ki nong shong shnong ka Jylla khamtam iaki longiing ba duk” u la ong.
U Bah Ardent u la pyntip ba u la leh ka jingtohkit halor ki dor jong ki marbam daka ba ia nujor hapdeng ka Mizoram, Assam bad Meghalaya bad la shem ba, ka dor jong ki marbam kaba heh kadei hi ha Meghalaya.
“Ha Mizoram ka dor u Sohsaw ka long T.45 shi kilo, ha Assam T.40 bad ha Meghalaya T.50 shi kilo, Sohmynken ha Mizoram bad Assam ka long T.80, ha Meghalaya ka long T.110, u Beet ha Mizoram T.40, ha Assam T.45 ha Meghalaya T.70 shi kilo” u la ong.
U Bah Ardent u la pyntip ruh baka Umphniang (Mustard Oil), ha Nagaland ka long T.155 shi liter, T.140 ha Assam hynrei T.180 ha Meghalaya, ka Umphniang (Refine) T.128 ha Nagaland, hynrei haduh T.150 ha Meghalaya.
Haba iadei bad ka doh (Syiar), ha Nagaland ka long T.270 shi kilo, T.300 ha Meghalaya hynrei ha Assam ka long tang T.260, ka Doh Sniang, T.350 ha Nagaland, T.480 ha Meghalaya, T.380 ha Assam bad ka Doh Masi, ha Nagaland T.300, ha Meghalaya T.500 bad tang T.270 ha Assam
