U Myntri Rangbah barim ka jylla, uba dei ruh u nongialam jong ka seng Trinamool Congress, u Dr Mukul Sangma mynta sngi u la shah thung kum u nongialam jong ka liang pyrshah jong ka Ing Dorbar Thawain ka jylla ha ka jaka jong u Bah Ronnie V Lyngdoh na ka seng Congress, uba la sah marwei hadien ka jingphet seng jong ki lai ngut ki MLA ka seng ba kynthup ia u Bah Charles Marngar, Dr Celestine Lyngdoh bad u Bah Gabriel Wahlang.
Ka jingthung ia u Dr Mukul Sangma kum u nongialam ka liang pyrshah lane u Leader of Opposition la pynmih da u Speaker jong ka Ing Dorbar Thawain ka jylla, u Thomas Sangma mynta ka sngi. U Thomas Sangma, u la pynmih ruh ia ka hukum ba la thung ruh ia u Bah Ronnie V Lyngdoh kum u Opposition Chief Whip.
Lyngba katei ka jingshah thung kum u nongialam ka liang pyrshah, u Dr Mukul Sangma u ioh ia ka kabu ban lamkhmat ia ka kynhun jong ka liang pyrshah ha ka sngi kut jong ka Autumn Session ka Ing Dorbar Thawain ka jylla lashai ka sngi, ka 30 tarik u Nailar, 2024.
Na ka liang ka seng All India Trinamool Congress, ka la pynpaw ia ka jingai khublei kaba kyrpang ia u Dr Mukul Sangma halor kane ka jingshah thung kum u nongialam ka pyrshah bad ong ruh ba ka jinglenlade bad ka jingaiti jong une u nongialam kan pynthikna ba ka sur jong bad ka jingeh ki paidbah kan sawa jam na ka bynta ba kin ioh ia ka hok bad kito kiba don haka bor synshar ki hap ban don iaka jingkitkhlieh.
