Ka kynhun Robotics ka skulbah USTM ka la ioh ban rah ia ka nam jop ha ka ‘Technoxian World Cup 2024’ kum ka kynhun lahduh ha kawei na ka jingialehkai ba la tip kum ka ‘World’s biggest Robotics Championship ba la pynlong da ka International Federation for E-Sports bad ba la kyrshan da ka Ministry of Electronics and IT bad Ministry ka tnad Tourism, ka sorkar pdeng bad ruh ka All India Council for Robotics & Automation.
Kane ka jaid jingialehkai ka dei kawei na ka jingialehkai ba bun kim pat tip paidbah, hynrei ha kane ka jaid jingialehkai la shim bynta tang da ki samla kiba don jingtip kaba kham bha shaphang kita ki Kali Robot’
Ia kane ka lympung ialehkai la pynlong ha ka 29 tarik u Nailar 2024 ha Noida Indoor Stadium bad lyngba kane ka lympung la iohi ia ki sap ki phong jong ki samla kiba pyniakhun ia ki Kali ba la tip kum ka Robotics.
Ki kynhun ba ioh rah ia ka nam jop na ka University of Science and Technology Meghalaya (USTM), ki kynthup ia ki saw ngut ba la tip kum ki brilliant minds: u Musabbir Islam bad u Kashyap Kalita na ka Physic Department, ka Natalia Chetia bad ka Gargi Bora na ka Biology Department, USTM, kiba la pynrem ia ka kynhun na Nepal.
Kane ka jingialehkai ba pyndonkam da ki Kali Robot ka dei kawei na jingialehkai kaba hap ban pynleit jingmut bha bad ba la pyndonka da ki kor ki bor ka juk stad mynta bad ha kane ka lympung la iohi ba ka kynhun na ka skulbah USTM ka la pyni ia ki sap kaba la tbit ban ia khun ia kine ki Kali robot haduh ba ka la ioh rah ia ka nam jop.
U Musabbir Islam na ka Physic department u la pynpaw ia ka jingsngewkmen ba la ioh rah ia kane ka nam jop ha kum kane ka pympung ba pyni ia kata ka jingtbit ha kaba pyniakhun lyngba ki Kali Robot bad kane ka jingjop kam dei satia tang ka nam bad ka burom bad ka paw ruh ia ka jingtrei shitom bad ka jinglen lade kumno ban pyndonkam bha ia ka sap ha kane ka jingiakhun ki Kali Robot, u la ong.
