U Symbut Myntri Rangbah ka Jylla uba khmih iaka tnat kam pohing (Police) u Bah Prestone Tynsong u la ong ba ka tnat kam pohiing bad ka tnad Ministry of External Affairs (MEA) ka Sorkar India ka dang buddien bha halor ka jingiap jong u nongialam ka party Awami League u Ishaque Ali Khan Panna.
Lah ban kdew ba ia ka met iap kaba la pyut shiteng jong u Ishaque Ali Khan Panna la lap hapoh kawei ka kper kwai ha ka shnong Dona Bhoi jong ka East Jaintia Hills ha ka 26 tarik Nailar.
U Bah Prestone u la iathuh ba iaka metiap la lap ha ka jingjngai kaba 1.3 km hapoh u pud u sam ka Ri India.
U la pyntip ba ka Sorkar Jylla ka la dep ban pyntip sha High Commissioner jong ka Bangladesh bad India bad ka Sorkar ka dang ap ia ka jingbthah na ka tnad kam pohiing ka Sorkar Pdeng halor kiei ki sienjam baka Sorkar Jylla kadei ban shim.
“Ka tnat Directorate Forensic ka la dep ban lum ïa ki sakhi sabut jong ka metiap na ka bynta ban pynshisha bad ban leh ïa ki Test, kumta ka dang kloi palat ban kren halor ka daw ba shisha jong ka jingïap jong u Ishaque Ali KhanPanna” la ong u Bah Prestone.
U Bah Prestone u la pyntip ba ki bahaïing jong u (Late) Ishaque Ali Khan Panna ki don ha lynti ban wan shimti ïa ka metïap.
U la pyntip ba ka Sorkar Jylla ka la dep ban ioh ia ki kaiphod na ki shipai BSF ha kaba ia dei bad kane ka jingjia bad ka kaiphod na ki shipai khappud, ka pyni ba kam shym la don kano ka dak ban pyni ba u Ishaque Ali Khan Panna u wan rung jubor sha Meghalaya, wat la ki shipai BDR Bangladesh ki la kam ba utei u nongialam ka party Awami League u la pyrshang ban phet sha India.
