Ka sorkar Meghalaya mynta ka sngi ka la aiti noh ia ka met u Ishaque Ali Khan Panna, uwei na u nongialam ka seng sain hima sima ha Bangladesh, kaba dei hadien ba ia ka met jong u, la lap ha ka 26 tarik u Nailar 2024 na ka kper kwai ha Dona Bhoi ba hap ha East Jaintia Hills District, la shu anta dba ka don kkumba 1.5 km ka jingjngai na Khappud India-Bangladesh ha kaba la ithuh ruh ia ka dur khmat jong u lyngba ka Passport jong u na Bangladesh.
Hadien ba la bud ryntih ia ki kyndon thik pa thik, ba ia ka postmortem examination la leh ha Khliehriat Civil Hospital, ia ka met jong u la aiti noh hakhmat ki ar ngut ki nongmihkhmat na ka Bangladesh High Commission bad ryngkat ka jingdon lang kiba haïing ha sem jong u, ba ia ka met la ati da ki bor synshar ka East Jaintia Hills ba la ialam da u ka Additional Deputy Commissioner ka Jacqueline U. Kharpuri. Kane ka jingsdang ban aiti ia ka met ka la sdang naduh ka por 5 baje mynstep bad ka la don ka jingkham slem ban aiti ia ka met kaba dei ruh hadien ba kiba haïing u Panna ki dang pan ia ka jingtip kaba bniah ka kaipod jogn ka Postmortem.
Na ka jingbud ryntih ia ki kyndon, la ait noh ia ka met u Panna sha kiba haïing hasem jong mynta ka shiteng sngi, ha ka jingdon ryngkat ki ophisar bad ki heh ophisar na Bangladesh bad na India. Na ka liang ka India la mihkhmat da ki bor synshar ka East Jaintia Hills, ki shipai BSF bad ki Pulit Meghalaya bad na ka liang ka Bangladesh la mihkhmat da k Border Guard Bangladesh bad ki Pulit na Bangladesh kiba la ia don lang ha kaba la aiti noh ia ka met sha kiba haïing hasem.
