Ka Meghalaya State Pollution Control Board (MSPCB) hynnin ka sngi ka la leit ban pynlong ka jingleit ban jurip kaba bniah ia kumba shiphew tylli ki kharkhna ha ka thain Byrnihat hadien ka jinglap ba kitei ki karkhana kim shym la buh ryntih ia ki kyndon kiba la buh da ka MSPCB kiba la dep ban pynmih, kiba iadei bad kumno ban iada ia ka mei mariang bad ki paidbah na ki jingsniew kiba la pynmih da kitei ki karkhana.
Ia kane ka jingleit ban jurip hynnin ka sngi, la lamkhmat da u Sampath Kumar, Principal Secretary jong ka tnad Forest & Environment ryngkat bad kiwei kiwei de ki heh ophisar ka MSPCB.
Ha kane ka jingjurip, la lap ba bun na kitei ki karkhna kim shym la pyndonkam satia ia u meter ban thew ia ka lyer jaboh, uba la tip kum u Pollution Control Device (PCD), kaba wanrah ia ka jingsngewkhia jur halor ka jingbym lah kitei ki karkhana ban pyntreikam ban pynduna ia ka jingmih jong ka lyer sniew lane ka lyer jaboh kaba ktah ia ka mariang bad ruh ia ki paidbah nongshong shnong ka thain.
Katkum ka jingthew kaba la leh ha katei ka sngi, la lap mardor iaka jingjur jong ka lyer jaboh kaba la poi haduh 64.2 μg/m³ bad ha ki 24 kynta lynter ka poi kumba 35 μg/m³ ha ka PM2.5 level, kaba la long palat laishah ia ka lyer kaba long ka bym bit bym biang satia ban ring mynsiem.
Wat lada na ka liang ka MSPCB na ka por sha ka por ka ju pynmih ia ki jingbthah ia kitei ki karkhana ban pynduna ia jingpynmih ia ki lyer jaboh kiba la tip kum kita ki Particulate Matter (PM10 and PM2.5), Sulphur Dioxide (SO2) bad Nitrogen Dioxide (NO2) katkum ki kyndon, bad run ban pyndait iaki [CD bad ki Online Continuous Emission Monitoring System (OCEMS), hynrei kiba bun hi na kitei ki karkhana, ki la iaid lait ia kitei ki jingbthah.
Halor katei ka jingiaid lait ia kitei ki jingbthah bad ki hukum kiba la pynmih, ka MSPCB ka la ai da ka jingthoh sha kumba 6 tylli na kitei ki karkhna ba kidei ban khang khyrdep noh tad haduh ba ki la lah ban pynbit pynbiang bad pyntreikam pura ia kitei ki jingdonkam kiba la ka MSPCB ka la bthah na ka por sha ka por.
Kitei ki 6 tylli ki karkhana kiba la shah ai jingthoh ban hap khang khyrdep noh ki kynthup ia ka Shillong ISPAT and Rolling Mill, Shyam Century Ferrous Limited, Nalari Ferro Alloys Pvt Ltd, Jaintia Ferroy Alloys Pvt Ltd, Maithan Alloys Ltd (Ferro Manganese) lem bad ka Khasi Alloys Ltd.
