U Myntri Rangbah ka jylla Meghalaya, u Conrad K Sangma haba kren sha ki lad pathai khubor mynta ka sngi u la iathuh ba ka jingiakren pynbeit biang ia u pud u sam bad ka jylla Assam ha ka wat kaba ar lane ka 2nd Phase kan sdang biang ha u bnai Risaw mynta u snem 2024.
Ia kane ka bynta, u Conrad K Sangma u la iathuh ba u la dep ban iakren ruh bad u Myntri Rangbah ka jylla Assam, u Himanta Biswa Sarma halor kaneka bynta ha ka jingiakynduh bamja miet ha ki lai taiew ne shi bnai eiei ba lah dep.
U Conrad K Sangma u la ong ruh ba kane ka wat kaba ar jong ka jingpynbeit pud bad ka jylla Assam kan kham long kaba kham jwat bad kaba eh, kumta hap ban da phikir bad bishar bniah shwa ban iaid shakhmat khamtam kum ha ki jaka kiba hap ha Langpih, Psiar, Khanduli, Block I bad Block II naba kine ki jaka ki don bun syrtap bad kim long satia kiba suk kum ha ki jaka kiba la dep iakren pynbeit ha ka wat kaba nyngkong.
Shuh shuh, u la ong ruh kumba ka jingthmu bad jing angnud ka long kumjuh hi naduh kaba sdang, hynrei namar na ka jinglong jingman jong kine ki jaka, ka sorkar ka hap ban iaid shakhmat ha ka rukom kaba phikir bad husiar khnang ba yn lah ban pynbeit ha ka rukom kaba biang bad kaba wanrah jinghun lang ia baroh.
