Ban pyndep iaki jingdonkam haba iadei bad ka jingpynbna iaki Electoral Roll haki MDC constituency naka bynta ka ilekshon MDC shaka KHADC bad JHADC, ka Sorkar Jylla kala pynjlan biang sa 6 bnai iaka samoi treikam jong ki artylli District Council.
Ia kane la pyntip da u Symbud Myntri Rangbah ba khmih ia ka tnat District Council Affairs (DCA), u Bah Prestone Tynsong.
Haba kren sha ki lad pathai khubor u Bah Prestone u la ong ba ka jingpynkhreh ia ka ilekshon MDC hapoh ka KHADC bad JHADC ka la iaid shakhmat.
U Bah Prestone u la ong ba ka jingpynjlan sa mar 6 bnai ia ka samoi jong ka KHADC bad JHADC kan kut ha ka 5 tarik Lber 2025 bad hashuwa ka kane ka por la dei ban pyndep noh ia ki ilekshon.
“Ka jingpynjlan ia ka samoi treikam jong ki ADC la leh katkum ka aiñ ba la ai bor hapoh ka riti synshar bad ka jingpynjlan lah ban leh tang haduh 12 bnai bad lada hapoh ka 12 bnai ba la pynjlan ym pat lah ban pynlong ia ki ilekshon, yn pynbna noh daka Administrator Rule” la ong u Bah Prestone.
U Bah Prestone u la ong ba nym lah ban pyndep ia ka jingpynkhreh iaki ilekshon tang khyndiat por bad namar kane ka kyndon ka AD Rules ka kren shai lah ban pynjlan haduh 12 bnai.
U la ong baka Sorkar Jylla kala hap ban pynjlan iaka samoi treikam ki ADC khnang ban pynbeit ia ki Constituency katkum ka kaiphod jong ka Delimitation Committee bad ban pynrung ruh ia ki Constituency thymmai hapoh jong ka AD Rules.
Haba iadei bad ka jingpynkhreh iaka ilekshon, u Symbud Myntri Rangbah u la ong ba kan shim por ym duna iaka 3 bnai eiei ban wanrah bad pynpoi iaki EVM shapoh Meghalaya.
