Ka sorkar pdeng lem bad ka sorkar jong ka jylla Tripura mynta ka sngi ki la soi ia ka iasngewthuh jingmut ‘Memorandum of Settlement’ bad ki seng kieng atiar jong ka jylla Tripura ba kynthup ia ka National Liberation Front of Tripura (NLFT) bad ka All Tripura Tiger Force (ATTF) ha ka nongbah New Delhi kaba la wan ban iadon ryngkat lang da u Home Minister ka ri, u Amit Shah, u Myntri Rangbah ka jylla Tripura, u Manik Saha, ki heh ophisar ka Home Affairs jong ka ri bad ruh ki heh ophisar ka jylla Tripura.
Kane ka jingiasoi sngewthuh jingmut hapdeng ka sorkar pdeng, ka sorkar Tripura bad kitei ki ar tylli ki seng kieng atiar, ka long ruh kum shibynta ban pynurlong ia ka jingangnud jong u Myntri Rangbah ka Ri, u Narendra Modi ban pynlong ia ka thain shatei lam mihngi kaba lait na ki seng kieng atiar bad kaba don ia ka shongsuk shongsain.
Haba kren ha kane ka sngi, u Amit Shah u la ong ba kane ka sngi ka long kaba kongsan tam ïa ka ri baroh kawei bad ïa ka jylla Tripura dakaba ngeit skhem ba hapoh ka jingialam jong u Narendra Modi kum u Myntri Rangbah ka ri, ka NLFT nad ATTF kin pynkut noh ia ka jingkynad kaba la neh 35 snem tam na ka bynta ka roi ka par bad ka shongsuk shongsain jong ka jylla Tripura.
U Amit Shah u la ong ruh ba naduh ba u Narendra Modi u la long kum u Myntri Rangbahduh ka Ri, u la buh ia ka thong ban pynroi ia ka thain shatei lam mihngi lyngba ka suk ka sain bad ki jingiakren sngewthuh jingmut da kaba bynrap ruh ba u Narendra Modi uym tang ba u pyniajan ia ka nongbah Delhi bad ka thain shatei lam mihngi lyngba ka jingpyniasoh ia ki lynti rel, ki liengsuin bad ki surok, hynrei ban pyniajan ruh ia ka jingsngewthuh jingmut ia ka jingiapher hapdeng ka jinglong briew. U la ong ba ka Sorkar India ka la rai ban pynroi ïa ka thain shatei lam mihngi baroh kawei kaba kynthup ïa ka jylla Tripura lyngba ka jingmut bad jingthmu jong ka ‘Ashtalakshmi’ bad ‘Purvodaya’, ha kaba kane ka jingiasoi sngewthuh jingmut mynta ka sngi kan long ka jingjop kaba khraw.
U Amit Shah u la ong ruh ba kane ka jingiasoi sngewthuh ‘Memorandum of Settlement’ ka dei ka ba 12 ha ka thain shatei lam mihngi bad ka ba 3 kaba iadei bad Tripura. U la bynrap ba lyngba kine ki jingiasoi sngewthuh jingmut, kumba 10 hajar ngut ki kynhun ‘riew kieng atiar ki la iehnoh ia katei ka kam kieng atiar bad pyniasoh ialade sha ka imlang ka sahlang da kaba bynrap ruh ba kumba 12 tylli na kitei ki jingiasoi sngewthuh jingmut ki la iarap ban pynduna shikatdei ia ka jingduhnoh jong ki mynsiem briew.
Lyngba kane ka jingiasoi sngewthuh jingmut mynta ka sngi kumba 328 ngut ki ‘riew kieng atiar ka NLFT bad ATTF ki shim ia ka rai ban ieh noh iaka jingkieng atiar bad wan ban im pat kum kiwei pat ki riew paidbah ha ka imlang ka shalang ban iarap kyntiew ia ka roi ka par jong ka shnong ka thaw ka jylla Tripura hi baroh kawei. U la iathuh ruh ba ka sorkar pdeng ka la buh ia ka mang tyngka kaba kyrpang haudh T. 250 klur na ka bynta ban wanrah ia ki kam pynroi na ka bynta ka jaidbynriew ritpaid bad ka jylla Tripura hi baroh kawei.
Ha kane ka sngi, u Amit Shah u la pyntip ruh ba ka sorkar pdeng hapoh ka jingialam jong u Narendra Modi ka la dep ban weng noh ia ka Armed Forces Special Powers Act (AFSPA) naduh u snem 2015 bad pyntip ruh ba ia kane ka juh ka ain kaba pynkup bor ia ki shipai, la weng ruh na ki bun ki jylla ka thain shatei lam mihngi. U la ong ruh ba kane ka sorkar, ka don ia ka thong ban wanrah ia ka roi ka par bad ban pynneh pynsah ia ka jinglong kyrpang jong ki jaidbynriew ka thain shatei lam mihngi ym da ka bor shipai hynrei lynba ki kam pynroi bad ka shongsuk shongsain.
