Ka President ka ri India ka Droupadi Murmu, ka la shim ia ka kabu ban ai khublei kyrpang ia baroh ki nonghikai hapoh ka ri india, shuwa ba kin ioh ban rakhe ia kata ka sngi kyrpang ba la tip kum ka sngi kyrpang ki nonghikai (Teacher’s Day) ba la rakhe man la u snem ha ka 5 tarik u Nailur.
Haba phah ia ka kyrwoh khubor, ka President ka ri ka Droupadi Murmu ka la ong, “Ha ka sngi rakhe ïa ki nonghikai, nga ai ka jingkhublei kitbok kitrwiang ïa baroh ki nonghikai ha ka ri jong ngi. Kane ka sngi ka dei ka sngi kha jong u riewstad ba khraw jong ka pule puthi, bad u President barim jong ka ri India u Dr. Sarvepalli Radhakrishnan, uba la long ka jingai mynsiem ha ka ri hi baroh kawei. Ka la ai khublei kyrpang ruh ia une u riewkhraw ka ri ha kane ka sngi kyrpang ki nonghikai.
Ki khynnah ki long ka lawei jong ka ri. Kum ki samla pule ki hap ban pule kumno ban dang pyntbit ia lade bad ruh ba ki dei ban don ka dor kaba rem hapoh ka ri. Ki nonghikai, ki dei kita kiba lam lynti, ki lah ban thaw dur ia ki khynnah skul sha ka lynti ban long kita ki nongialam ha ka lawei bad ki ban sain dur ia ka lawei jong ka ri jong ngi.
Ia ki nonghikai la ai ka jingshaniah ban leh ia ka kam kaba bha tam na ka bynta ban saindur ia ki jingmut jingpyrkhat jong ki khun ki kti, ban hikai kumno ban poi sha ka thong jong ka jingim. Ki nonghikai ki don ruh ia ka kam ram ban pashad ia ka bor pyrkhat ki khynnah, ban sneng ban kraw bad ban leh shibun ki kam kiba kyntiew ia ki kam kiba bha na ka bynta ka lawei jong ka imlang ka sahlang. Lyngba ki buit thymmai katkum ka juk ba mynta ban ai jingnang jingstad ia ki ki khynnah bad ruh ka jingpyndonkam ia ki kor ki bor Katkum ka juk stad ba mynta kumba la pynkup bor ruh lyngba ka National Education Policy 2020, ki nonghikai ki don ia ka bor ba khraw ban pynkup bor ne saindur ia ki samla pule ba kin long kiba seisoh ha ka jingim bad ba kin lah ruh ban trei na ka bynta ka lawei ba bha jong ka ri ban kiew ha baroh ki liang.
Shuh shuh, sa shisien ka la phah ruh ka jingkitbok kitrwiang sha baroh ki nonghikai ha kapoh ka ri ha kane ka sngi kyrpang jong ki bad ka kyrmen skhem ruh ba kum ki nonghikai kin dang trei shitom ban aiti met bad mynsiem ban tei ia ka imlang ka sahlang bad khamtam ban kyntiew ia ki samla pule ka ri ba kin don ia kata ka jingkitkhlieh ban rah ia ka nam ka ri sha ki kyrdan kiba kham shalor bad shajrong.
