Ka jingkynnoh pyrshah ia u Symbud Myntri Rangbah ka Jylla ba donkti lum pisa na u Droks ka long kaba khlem nongrim.
Ia kane la ong da u Myntri Rangbah ka Jylla u Conrad K Sangma halor ka jingkynnoh u President ka MPCC u Bah Vincent Palat, uba la kynnoh ba u Symbud Myntri Rangbah ka Jylla u Bah Sniawbhalang Dhar u donkti lum pisa na u Drok.
“Kum u MP barim bad uba dei ruh u President ka MPCC kam iahap sa tia ba un shuh kynnoh kum kitei ki kyntien khlem da don ki sakhi sabut bad ka jingkynnoh halor ki kam drok ka long pyrshah ia ka imlang sah lang bad ka long pyrshah ia ka Ri” la ong u Conrad.
U Conrad u la ong ba kane ka jingkynnoh ka long ka bym don nongrim, ka bym sngewtynnad ba kum kitei ki nongialam kiba la don ha ka kyrdan kin pynhiar ialade haduh kata ka kyrdan bad ban kynnoh pyrshah ia kiwei pat ki nongialam.
Haba iadei bad ki sienjam baka Sorkar ka shim ban ratdkhong ia u Drok napoh ka Jylla, u Myntri Rangbah u la ong ba ka Sorkar jylla kan sa thaw ia ki District Level Committee ban peit ha kaba iadei bad ki ishu jong u Droks bad ban pyntreikam ia ka Meghalaya Residents Safety and Security Act (MRSSA), 2016.
“Ngin sa thaw ia ki committee ha ki District kaban sdang na ka Shillong, Tura bad Jowai, kiban peit ia ki bynta kiba iadei bad u drok, ka jaka ai jingsumar bad kiwei kiwei ki bynta namar ba kane ka jingma kadei kaba ngi hap ban iatreilang da baroh ban iakhun pyrshah ia ka” u la ong.
