Ka Ministry of Development of North Eastern Region (MDoNER) mynta ka sngi ka pynpaw ia ka jingsngewkmen kaba khraw hadien ba ka President jong ka ri, ka Droupadi Murmu ka la pynkup burom ia ka khusnam National Teachers Award 2024 ia u Bah Everlasting Pyngrope, Principal jong ka Mynken Christian Higher Secondary School ka jylla Meghalaya.
Ha kajuh ka por ka North Eastern Council (NEC) ruh ka pynpaw ia ka jingsngewsarong shikatdei halor ka jingshah pynkup burom u babu Everlasting Pyngrope mynta ka sngi, kaba la pynlong ha Vigyan Bhavan jong ka nongbah New Delhi.
Ka MDoNER lem bad ka NEC ki la pynpaw ba kane ka jingioh khusnam jong u babu Everlasting Pyngrope kadei halor ka jinglenlade bad ka jingshakri ka jong u met bad mynsiem ban kyntiew ia ka jingnnag jingstad sha ki samla pule ka thain, bad bynrap ruh ba kane ka jingioh khusnam ka jong u ka long da shisha ka burom bad ka jingsarong kaba khraw ia ka jylla Meghalaya bad ka thain shatei lam mihngi hi baroh kawei.
Kum ban shu kdew hangne, kumba 50 ngut ki nonghikai na ki 28 tylli ki jylla, 3 tylli ki Union Territories bad 6 tylli ki seng bapher bapher jong ka ri India, kiba kynthup ia 38 ngut ki shynrang bad 16 ngut ki kynthei, ki la shah pynkup burom ha ka President jong ka ri, ka Droupadi Murmu mynta ka sngi.
