Haba shimkhia halor ka jinglong jingman ha ka ri Bangladesh, ki Sector Commander jong ki shipai Border Security Force ka ri India lem bad ki shipai Border Guard Bangladesh (BGB) mynta ka sngi ki la pynlong ia ka jingialang ban iakren halor ka jiingtreilang bad sngewthuh jingmut ban pahara ha ki thain khappud ka ri India bad Bangladesh lyngba ka jylla Meghalaya.
Ia kane ka jingialang, la pynlong ha Barsora Land Custom Station jong ka ri Bangladesh ha kaba la wan ban iadon ryngkat da u Majoj Kumar Barnwal, DIG, Sector HQ BSF Shillong, u Saiful Islam Chodhury, Deputy Director General, Sector Commander BGB, Sylhet, Bangladesh lem bad kiwei kiwei de ki heh shipai ka BSF bad BGB.
Ha kane ka jingialang, ki commander jong ka BSF bad BGB kiba pahara ia ka khappud India bad Bangladesh ruh kumjuh, ki la ioh ban iatai sani ia shibun ki mat kiba iadei bad ka jinglong jingman ha ki thain khappud bad ruh kham tham ban don ia ka jingiasngewthuh jingmut baroh ar ki kynhun shipai BSF bad BGB.
Ha kaba kut jong kane ka jingialang, baroh ar ki kynhun shipai, kata ki BSF jong ka ri India bad ki BGB jong ka ri Bangladesh, ki la pynpaw ia ka jinghun halor ka katei ka jingialang, kaba pynpaw ia ka jingiajan hapdeng kine ki ar tylli ki ri.
Lyngba ka jingialang mynta ka sngi, ki commander jong kine ki ar tylli ki kynhun shipai ka ri India bad Bangladesh kiba peit bad pahara ha ki thain khappud, ki la shim ia ka rai ban pynneh pynsah ia ka shongsuk shongsain, ban don ka jingiakynduh manla ka por na ka bynta ka jingiaid beit iaid ryntih ha ki kam khappud hapdeng kine ki ar tylli ki ri ba marjan.
